Dhaka, Jymmang:
Katkum ki khubor, la ong ba ki skul ha kylleng ka ri Bangladesh naduh ka Sngi U Blei ki la sdang ban plie bad treikam biang kumba ju long barabor hadien ba ka jingshit bad jingkhluit jong ka suiñbneng ha katei ka ri ka la kham duna na ka 40 Degree Centigrade.
Namar la ong ba ki bor pyniaid ka Bangladesh ki la pynsangeh noh ia ki jingpule ha baroh ki skul bad ki jaka pule kiba don ha kylleng sawdong jong ka ri namar ka jingshit kyrang bad jingkhluit palat jong ka suiñ bneng bad kaba long ruh ka jingma kaba khraw ia ka koit- ka khiah jong ki paidbah. Hynrei ha kane ka kynti, ki bor pyniaid ka Bangladesh ki la pynbna ia ka jingsdang pyntreikam bad ban plie lad biang ia ka pule- puthi na ka bynta ki 33 Million ngut ki khynnah pule jong ka ri katba ki eksamin bapher bapher ruh ki la jan.
Namar la ong ruh ba shibun ngut ki nongshong shnong ka Bangladesh ki la shu ioh kem pang bad don ruh kiba khlad kyndit- kyndit namar ka jingkhluit palat jong ka suiñbneng ha kine ki khyndiat taiew bad ki khyndiat por ba la leit. Kumta, ban tehlakam ia kine ki jingma kiba ap ia ki paidbah nongshong shnong khamtam eh ia ki khyllung- khynnah, ki bor pyniaid ka Bangladesh ki la pynsangeh noh shwa shipor ia ka pule- puthi wat hapdeng ka jingpynkhreh ia ki eksamin kiba pher ba ki khynnah pule ha katei ka ri ki dei ban iakhun ha kine ki bnai.
Kumta, la ong ba ia ki skul bad jingpule baroh yn pyniaid naduh ka Sngi U Blei haduh ka Sngi Palei man la ka taiew namar ba katei ka ri ka bud ia ka rukom treikam jong ki jaitbynriew Islamic bad kumta kitei ki long ki sngi treikam bad ki sngi pohia naka bynta kitei ki jaitbynriew ha katei ka ri.
Haba iadei bad kane, ki kmie- ki kpa jong ki khynnah pule ha kylleng ka ri Bangladesh, ki la pdiang sngewbha ia katei ka rai na ka Sorkar Bangladesh.
Ki stad saïan ‘Scientists’ ki la iathuh ba ka jingkylla jong ka suiñbneng ha kine ki sngi mynta kan wanrah ia ki jingshitom bapher ki ban ktah khamtam ia ki khyllung- khynnah.
Ha kawei pat ka jingjia, la ong ba ka la don ka jingpluh khlaw kaba jur ha ka Sngi Saitjaiñ namar ka jingkhlaiñ bad jingthang palat jong ka sngi ha katei ka sngi bad katei ka ding ka la pur shaduh sha ki 3 tylli ki thaiñ jong ka Sundarbans, kaba long ka khlaw kaba heh tam ha ka pyrthei bad kaba long ruh ka jakashong lane ka jaka rieh tngen jong ki khla ‘Royal Bengal’. Ia katei ka ding baroh la lah ban tehlakam tad haduh ka Sngi U Blei ba ki tnat pynlip ding ki la ioh ban pynlip noh soit ia baroh ka ding kaba klang ha kitei ki 3 tylli ki bynta jong katei ka nongbah.
Nalor kata, la ong ba ka jingshit kyrang bad ka jingkhluit palat jong ka suiñbneng, ka la pynlong ia ki wah bad ki um kiba don ha katei ka ri ba kin rngat bad tyrkhong noh. Namarkata, kiba bun ki bynta jong katei ka ri ki la hap ban mad ia ka jingkyrduh um bad ha kajuh ruh ka por ka jingduh bor-ding ilektrik khnang ban lah ban pynneh bad ban pyndonkam kunai bad ban lait na ki jingeh ki ban wan hadien lada ka jingkhluit bad jingshit kan dang neh slem.
