Jerusalem, Jymmang:
U heh jong ka United Nations uba dei khmih ia ka tnat ba peit ia ki phetwir nong Palestine- ka UNRWA, ha ka Sngi U Blei u la iathuh ba ki bor pyniaid ka Israel ki la khang ia u ha ka por ba u mut ban leit rung sha Gaza ha ka sien kaba ar kumba long ha ka sien ba nyngkong ba u la leit ban rung sha katei ka nongbah naduh ba la iaid ka thma hapdeng ka Israel bad ki Hamas.
Na ka liang utei u heh ka UN u la pynpaw ia ka jingsngew bitar namar ha kane ka sien kaba ar ruh ka Israel kam shym ailad ia u ban leit rung sha katei ka nongbah ha kaba u la pynbeit ban leit kynduh markhmat ia ki dkhot jong ka UNRWA, kynthup ia kito kiba don ha ka kyrdan kaba hakhmat ban khmih ia ka jinglong- jingman jong ki nong Palestine hapoh Gaza.
La ong ba u Lazzarini u la leit rung sha Gaza la saw sien kynthup ia ka jingleit jurip jong u sha Gaza ha ka 17 tarik jong u Lber ba la leit.
Kumta, la ong ruh ba ki bor pyniaid ka Israel ki ialeh ban khang lad bad ban kyntait ia ki jing-iarap ba la phah da ka United Nations sha Gaza watla kam lah ban sangeh noh ia ka thma kumba la kyntu da kiba bun ki tnat.
Ka UN ka la iathuh ba tang hapoh jong kine artaiew, la sakhi ia 10 tylli ki jingjia naduh ka jingshah siat ki dkhot katei ka tnat, ka jingshah kem bad jingshah bat jong ki dkhot ka UN bad wat ban pyniaid lyngkhuit ia ki. Kumta, ka UN ka la pynpaw ia ka jingbitar ba kan nym lah ban pdiang ia katei ka jingleh be-aiñ bad jingleh bym suitñiew jong ka Israel lada kan iai long hi kumtei kumjuh kumba ka leh ha kine ki sngi ba mynta.
Ha kajuh ka por, utei u heh u la dawa ia ki tnat wad bniah ba kin wad ia ka daw ne ka jingthmu jong ka Israel haba iadei bad ka jingkyntait jong ka Israel ba kam shym la leh khnang ban ther bom sha ki jaka rung ban pynpoi ia ki lad jingiarap sha Gaza kiba la julor bad khang-lad noh ia ka jingpynpoi ia ki mar bad ki lad jingiarap sha ki paidbah nongshong shnong ka Gaza ha kane ka por.
