Bengaluru, Jymmang:
U Symbud Myntri Rangbah jong ka Karnataka bad u heh nongïalam jong ka Congress u DK Shivakumar u la shah kynthoh jur hadien ka jingsaphriang jong ka durkhih kaba la pyni ba u la thap ïa uwei u briew ha ka por ba bun ki paidbah kiba pyrta ïa ka kyrteng jong u.
Ha ka durkhih la ïohi ba u Shivakumar u la mih na ka kali lade ha ka por ba ki paidbah ki dang pyrta ïa ka kyrteng da ka kyntien ‘DK, DK’.
La ïohi ba une u briew u la buh da ka kti ha ka tyrpeng jong u. Kumba la ïohi la ong ba u Shivakumar u la kyndat ïa kane ka kti bad ai shi thap ïa une u breiw, la ïathuh ka tyllong khubor.
Kane ka jingjia ka la jia ha ka thaiñ Savanur jong ka Haveri distrik, ha ka por ba don ka jingïalap paidbah na ka bynta ban ai jingkyrshan ïa u kyrtong jong ka seng Congress u Vinod Asuti, u ban ïakhun ïa ka ilekshon pyrshah ïa u kyrtong jong ka seng BJP u Pralhad Joshi.
Ïa une u briew uba la shah thap la ithuh ba u dei u nongbud jong ka seng ha kaba la paw ba u la sngewlehraiñ bha da kane ka jingshah thap jong u ha u heh nongïalam jong ka seng Congress bad u la shu leh mynleh noh ba um don jingsngew ei ei da kaba pyni da ka khmat phuh samrkhie, la bynrap shuh shuh ka tyllong khubor.
Hadien kane u la shah ïalam noh ha pulit pahara jong u Shivakumar. Hadien ba kane ka durkhih ka la saphriang kylleng la ïohi ïa shibun ki jingkynthoh ha ki lad phah khubor.
Ha kaba la ïohi ba la don kiba pynrem pyrshah ïa une u briew uba la leit snoh na ka tyrpeng jong u Shivakumar bad don pat kiba la pynrem ïa u nongïalam ba u la leh palat ha kaba u la ktah kti ïa une u dkhot jong ka seng.
