Shillong, Jymmang 06
Ka jingmaramot ïa ka jingkieng ha ka pung Umïam, ym tang ba ka wanrah ïa ka dheng kali kaba jubor bha man ka sngi hynrei ka la pynsyrtok shi katdei eh ïa ki ‘riew paidbah nongleit-nongwan lyngba kane ka jingkieng.
Katkum ka jinglong-jingman ha ka liang ka ïaid ka ïeng jong ki kali lyngba kane ka jingkieng, la ïohi ba la shah tang ïa ki kali rit bad ha kaba la pyllait shiliang shiliang, kata haba pyllait ïa kiba hiar la khang ïa kiba kiew, kaba bteng naduh mynstep haduh ka por mynmiet.
La ïoh ban sakhi ba ka jingsahkut kali shiliang shiliang ka jrong bha, kata tang la pyllait shiliang, kawei ka liang ka la sakhi ïa u laiñ ba jrong bha jong ki kali kiba bud kawei nadien kawei.
Haba peit ïa ka rukom pyllait kali ruh kam da long kaba ryntih, namar la ïoh ban sakhi ba kane ka shong ha ki nongpynïaid. Teng-teng haba pyllait ïa ki kali kiba hiar la pyllait shisien pyllait da ki spah tylli bad ïa kiba kiew pat la pyllait tang da ki phew tylli bad teng-teng pat ïa kiba kiew la pyllait da ki spah tylli bad kiba hiar la pyllait tang da ki phew tylli.
Hynrei wat hapdeng ka jingsyrtok jong ki ‘riew paidbah, la ïoh ban sakhi pat ba kane ka jingpyrkhing kam treikam satia ïa ki heh ki haiñ namar ki ïoh ïaid beit ha la ka mon khlem jingkhuslai ryngkat ka jingpynpah ïa ka ‘Siren’ bad ym lah ban tip la ki dei shisha kiba kyrkieh kam ne kiba leh mynleh tang ban lait syllang kumba long ki ‘riew paidbah.
La ïoh ban sakhi ba wat la ka don ka jingpyllait ïa ki kali kiba hiar sha thaiñ Bhoi, hynrei kito ki kali ki heh ki haiñ kiba dei ban sangeh bad ailad shwa ïa kito ki kali kiba hiar, hynrei ki tur beit rak rak napdeng, haduh ba ki kali ki riew paidbah ki hap ban kiar sharud sha kiar ne dam don jaka kiar la hap ban sangeh shwa bad ailad ba kin ïaid ki heh ki haiñ.
Hooid, kam dei ba la shu kynnoh eh tang ïa kita ki heh ki haiñ namar wat ki kali jong ki riew paidbah ruh, kito kiba nud ki tur beit rak rak bad ki bym nud ne kiba bud ryntih pat ïa ka jingbthah ki bud ryntih ïa ki kali. Hynrei katkum ba lap, ka jingtur bad shim pass jong ki kali ki riew paidbah ka long beit thik tang ha ka bynta kaba pyllait ïa ki kali, lada pyllait ïa kiba hiar, kito ki kali kiba hiar ki ïaleh ban knieh shakhmat bad her wut-wut bad kane ym tang ba ka pynsyrtok ïa kiwei hynrei ka buh ruh ha ka jingma na ka jinglah ban mih ka jingïatyngkhuh kali.
Te halor kine kiei-kiei ïano yn kynnoh, la ka dei ïa ka tnat pynïaid kali ne ka jingleh ki heh ki haiñ kiba tur beit rak rak ban jam beit wut-wut na shiliang sha shiliang ne ïa ka jingbym burom mar kylliang jong ki nongleit nongwan namar ha kane ka juk ba mynta, la ïohi ba baroh ki la shu ïa kyrkieh beit.
