Guwahati, Jymmang:
U Jitendra Singh uba long u General Secretary jong ka Congress bad uba peit ïa ki kam jong ka seng ha Assam, ha ka Sngi U Blei u la ong ba yn sa pynshitom katkum ki kyndon aiñ bad dawa ban beh noh ïa ki MLA kiba pyrshah ïa ki rukom pyntreikam jong ka seng.
Ha ka por ba la kren ïa kine ki kyntien, u heh nongïalam jong ka seng u la kynthoh ruh ïa u Lamphang jong ka Assam Legislative Assembly, u Biswajit Daimary ha kaba u la kynnoh ïa u ba u la leh kiar ha kaba ïadei bad ki jingkyrpad jong ka seng ha kaba ïadei bad ka jingphah pynduh noh ïa ka jinglong dkhot jong kine ki dkhot ka seng ha ïingdorbar.
U Singh u la pynpaw shuh shuh da kaba ong ba ka jingbym don kino kino ki jingpynshitom ki ban wan na u Lamphang, ka la pynlong kumba ong ka sorkar BJP ba kam don kano kano ka jinglah pyntreikam ha kaba ïadei bad ki jingpynshitom katkum ki kyndon.
U la bynrap shuh shuh da kaba ong ba shen ka seng Congress kan sa leit mih hakhmat ka High Court bad wat hakhmat ka Supreme Court lada ba y shimkhia ban weng noh ïa kine ki MLA.
U la bynrap shuh shuh da kaba ong ba ki la don shibun ki jngkyrpang ïa kiba la phah sha u Lamphang ha kaba ïadei bad ka jingweng noh ïa kine ki MLA namar ka jingpyrshah jong ki ïa ki rukom pyntreikam jong ka seng hynrei kam shym la don kano kano ka jingpynshitom pyrshah ïa ki.
Kine ki jingleh jong kine ki MLA ki long ha kaba ki la ai jingkyrshan ïa ka sorkar synshar, ka jingpyrshah ïa ki kyrtong ba pynïakhun ha ka ilekshon bad ka jingleit ïalap ilekshon pyrshah ïa ki kyrtong jong ka seng Congress.
