Shillong, Jymmang 07
Ka shlem treikam u District Sport Officer (DSO) Ri Bhoi District ka la rai ban sdang noh ïa ka lympung ïalehkai District Level Inter School Athletic Meet 2024 naduh 9 haduh 11 tarik mynta u bnai ha ka sngi Balang NSCA Mini Stadium Pahamsyiem kaba ha Nongpoh.
Kane ka la wan hadien ka jingpynkynriah na ka 1 haduh 3 tarik mynta u bnai na ka daw ka jingshit kyrang jong ka sngi ha kine ki khyndiat sngi ba la lah.
Na ka liang u DSO katei ka district u Bah Bobby L. Nongbet u la pynpaw ba ïa kane ka lympung yn pynlong noh naduh ka 9 tarik. “Ngi sngewkmen ban pynbna na ka bynta ban sdang noh ïa ka District Level Inter School Athletic Meet naduh ka 9 tarik haduh 11 tarik mynta u bnai Jymmang. Lyngba ka jingwan u slap ka la pynlong ïa ngi ki bor pynïaid ban ïaid noh shakhmat ïa kane ka lympung namar ka State Level Athletic Meet ruh kan sdang ha kaba kut jong u bnai.”
“Ki skul ki ban ïashim bynta ha kane ka lympung ki don baroh 30 tylli kiba na kane ka district bad ïa kane ka lympung yn wan ban plie da u General Secretary ka MSOA u Bah Fine L. Pariat kum u kongsan,” u la bynrap.
Ki jingïalehkai ki ban pynlong ha kane ka lympung ki kynthup naduh ki jingïakop mareh bapher bapher, ka High Jump, Long Jump, Shot Put, Javelin Throw bad kiwei.
Ki nongïalehkai kiba kynsai na kane ka lympung kin shah jied ban mihkhmat na kane ka district ban leit ïashim bynta ha ka State Level Inter School Athletic Meet ka ban sa long shen ha ka nongbah Shillong.
