Shillong, Jymmang 07
Ka Sorkar Jylla ka dang ap ban ïoh jingbit na ka Election Commission of India (ECI) ban thung Director General of Police (DGP) thymmai hadien ba ka Union Public Service Commission (UPSC) ka la phah ïa ka kyrteng jong lai ngut ki ophisar Indian Police Service (IPS) ha kaba iwei na ki yn sa thung ha kane ka kyrdan.
Ki lai ngut ki ophisar IPS kiba ka UPSC ka la phah ïa ka kyrteng jong ki ban shah thung ha ka kyrdan DGP ki long ka Kong Idashisha Nongrang (jong u snem 1992), R P Meena (jong u snem 1993) bad Deepak Kumar (jong u snem 1994).
Ka Sorkar lyngba ka tnat Pulit ka la pynmih ïa ka jingpynbna ha ka Sngi Ba-ar kaba ïathuh ba u DGP ba mynta u Dr. L.R Bishnoi ynda la dap 2 snem ka jingshakri kum u DGP un shongthait ha ka 19 tarik mynta u Jymmang, 2024.
Hynrei ka jingpynbna kam pat mih halor ka jingthung DGP thymmai ha kaba iwei na kitei ki lai ngut ki ophisar IPS kin poi sha ka kyrdan DGP.
Ka Kong Nongrang kaba la kham shwa kum ka ophisar IPS ka lah ban shah thung kum ka DGP bathymmai ka Jylla. Lada ka shah thung, kan dei ruh ka ophisar IPS kynthei kaba nyngkong eh na kane ka Jylla ban poi sha kane ka kyrdan.
Ka Kong Nongrang mynta ka dang shimti kum ka Director General (Civil Defence & Home Guards).
Dang shen, ka Sorkar Jylla ka la phah ïa ka kyrteng jong 5 ngut ki ophisar IPS sha ka UPSC ban jied ïa ki ban shah thung ha ka kyrdan DGP.
Kine 5 ngut ki long ka Kong Nongrang, R P Meena, Deepak Kumar, GP Singh (1991 batch) bad Harmeet Singh (1992 batch). Napdeng kine, G P Singh bad Harmeet Singh kim treh ban wan shimti lada shah thung ha ka kyrdan DGP.
