Mawkyrwat, Jymmang 07
Ka Mawkyrwat ka la duh noh ïa ka skhim ban pyntrei ïa ka Parking Lot (jaka ïeng kali) bad ka Shopping Complex, ha kaba la rah noh shawei ban pyntrei. Kane ka jingduhnong bakhraw ka dei tang namar ka jingbym don ka jingïasngewthuh jingmut.
U Deputy CEM ka Khasi Hills Autonomous District Council u Bah PN Syiem ha ka sngi wan jurip ïa ka KHADC Mawkyrwat Branch ha ka 6 tarik u Jymmang 2024, u la ïathuh halor ka jingbym ïoh shuh ban pyntrei ïa ka Parking Lot-cum-Shopping Complex hapoh Ïew Mawkyrwat ba la wan buh mawnongrim da ma u hi ha u snem 2016.
U la ong ba ka dei namar ba ka don ka jingbym ïasngewthuh jingmut hapoh ka Sankur kaba dei ka trai khyndew bad ka jingbym ïabeit ïabiang bad kumta ka la pynlong ïa kane ka skhim ban rah noh shawei pat sha ki jaka kiba biang.
U Bah Syiem u la ong ruh ba lada ka District Council kan bhah biang lyngba ka pisa kaba wan na Ministry, u kyrmen skhem ba da ka jingdon kane ka market complex kan ïarap shibun ïa ki briew kane ka thaiñ kumjuh ruh ban pynmih pisa ïa ka council bad kan long ka jingmyntoi ruh ïa ki trai jaka.
Kum ban shu pynkynmaw, ha u Naiwieng 2016, u Bah Pynshngaiñ N Syiem kum u CEM ha kato ka por bad ha ka jinglong MDC u Bah Hadrian Lyngdoh jong ka Mawkyrwat, la plie ïa u mawnongrim ban tei ïa ka Parking Lot cum Shopping Complex ha ïew Mawkyrwat kaba la mang haduh kumba 2.51 klur tyngka lyngba ka Special Plan Assistant (SPA), hynrei na ka daw jong ka jingbym sngewthuh jingmut ha kito ki snem, kane ka skhim ka la shu duh ei noh kumto.
