Shillong, Jymmang 07
Ha kawei ka jingjia ha ka Sngi Ba-Ar, ki pulit ki la pyntip ba ha ka por kumba 12:30 mynsngi, uwei u runar u bym lah ban ithuh u dei uei, u la dung da u thyrnia injek ïa uwei u samla uba la 19 snem ka rta bad uba wan thiah pang ha Civil Hospital, Shillong, bad ha kane ka jingjia, une u samla u la mynsaw.
Ha kawei pat ka jingjia, ki pulit ki la ong ba u Lebi Suting u la ujor ba ha ka 4 tarik Jymmang ha ka por kumba 1 baje mynstep, ki runar ki la tuh ïa uwei u Remote Radio Unit (RRU) uba shongdor kumba T. 3 lak na ka jaka ba don u ‘Tower’ ka kompani Airtel ha ka shnong Mawpran, East Khasi Hills.
Nalorkata, ki pulit ki la pyntip ba u Rohit Yadav u la ujor ba ha ka miet jong ka 3 bad 4 tarik Jymmang, ki runar ki la tuh ïa ka thuk-thuk jong u (ML-05Z-7240) na ka jaka sah kaba don ha Lumbasuk-A, Nongthymmai, Shillong.
Shuh shuh ha kawei pat ka jingjia, ki pulit ki ong ba u Myrphy H Passah u la ujor ba ha ka 2 tarik Jymmang ha ka por kumba 9:45 mynmiet, u la lap ba ki runar ki la leit prong ha ka ïing sah jong u ha Lumpyrtuh, Mihmyntdu (West Jaiñtia Hills) bad ki la tuh ïa artylli ki jingdeng ksiar bad ka pisa kaba don kumba T.6,000.
Ki pulit ki la ong ruh ba u Assistant Director, DDK Shillong u la ujor ba ha ka 1 tarik Nailar, 2023, u la lap ba ki la don bun bah ki tiar ki tar jong ka LPTV Jowai kiba la jah na ka shlem jong ka AIR Jowai.
Nalorkata, ki pulit ki la ïathuh ba ka B. Jushminara ka la ujor ba ha ka 3 tarik Jymmang ha ka por kumba 12:20 mynsngi, ki runar ki la tuh ïa ka thuk-thuk jong ka (ML-08H-6446) kaba la pynïeng ha Kaimbatapara, West Garo Hills.
Shuh shuh ki pulit ki la ong ba ha ka 4 tarik Jymmang, ki nongshong shnong ka Upper Damachiga, West Garo Hills ki la ïoh bat bad ki la shoh la dat ïa arngut ki briew, kata, u Esha Ali, 24 snem ka rta, bad u Robial Hoque, 20 snem ka rta, halor ka jingkynnoh ba ki la leit lute na ka ïing sah u Nokma, Upper Damachiga.
