Jowai, Jymmang 07
U District Sports Officer (DSO), West Jaiñtia Hills District, Jowai u la pynbna ba ha ka taïew ba ar jong u bnai Jylliew yn sdang noh ïa ka lympung ïalehkai “District Level Inter School Subroto Mukherjee Cup Football Tournament 2024” ha madan Kiang Nangbah Stadium, Jowai.
Kane ka lympung ïalehkai ka dei na ka bynta ki khynnah skul ha ka kyrdan ïalehkai Under-14 ki shynrang, katba ka Under-17 kan dei na ka bynta ki shynrang bad kynthei. Ïa ki form lah ban ïoh na katei ka shlem treikam ha ka por long trei.
Kino kino ki skul kiba kwah ban ïashim bynta kin pynpoi ïa ki kyrteng jong ki nongïalehkai ryngkat ki kot ba donkam kum ka Passport Size Photographs, Aadhaar Card, syrnot sngi kha ba la ïoh na ka Municipal Board/CHC/PHC hashwa ka 30 tarik mynta u bnai bad yn ym pdiang ïa kiba poi hadien jong katei ka sngi ba la buh.
Ïa ka jingjurip rta yn pynlong ha ka 3 tarik Jylliew naduh ka por 9 baje mynstep ha Kiang Nangbah Indoor Stadium, Jowai. Yn shah tang 20 ngut ki nongïalehkai ha kawei pa kawei ka kynhun.
Ka jingot snem na ka bynta ka Under-15 (Boys) ki dei kiba la kha hadien ka 1 tarik u Kyllalyngkot 2010. Under-17 hadien ka 1 tarik u Kyllalyngkot 2008. Ïa ki jingtip kiba kham bniah lah ban phone ha ki number 9402310523 & 9774407962.
