Shillong, Jymmang 07
U Myntri ka tnat Jngohkai Pyrthei, Bah Paul Lyngdoh, u la ong ba ka sorkar jylla kan sa pyntreikam noh ïa ka OTT ban kyntiew ïa ki phlim Khasi hapoh ka jylla mar shu dep ñiew ‘vote’ jong ka ilekshon MP Lok Sabha kata hadien ka 4 tarik Jylliew 2024.
Haba ïakren bad u Bah Paul hadien ba u la dep peit ïa ka phlim ‘Ka Chithi’ ha State Central Library, Shillong u la ong ba kane ka OTT kan dei ka thong ka sorkar ban kyrshan ïa ki phlim Khasi namar lada lah kyrshan ki nongpynmih phlim kin nang lah ban pynmih shibun ki phlim bad kan long ka lad aikam ïa ki samla.
U Bah Paul u la ïaroh ïa ka jingtbit ka Kong Simi Khongtiang ban shna ïa ka phlim (Ka Chithi).
U la ïathuh ba ka sorkar jylla kan shna noh ïa ka hall ha State Central Library ban pyni phlim Khasi, bad kumta u la kyrpad ïa ki ki paidbah ba kin ai jingkyrshan namar tang ka sorkar kam lah ban thaw pyrthei.
U la pyntip haba la pyni ïa ka phlim ‘Ka Chithi’ ha Library, ka sorkar ka la pynduna ruh ïa ka dor kum ka jingkyrshan bad u kyrmen ba ka sorkar kan pynbiang ïa ki hall ha man ki district khnang ban ai jingkyrshan shuh shuh ïa ki paidbah kin ïoh ban peit ïa ki phlim khlem da donkam ban kiew sha jaka sor.
Shuh shuh u la ong ba ki phlim Bollywood ki dei kiba heh tam ha ka pyrthei, hynrei lada pyni ïa ki phlim trai jylla kum ha Assam bad Manipur ki paidbah ki wan ai jingkyrshan. Kumta u kwah ba hapoh jylla Meghalaya ka dei ban long kumjuh.
“Kumba ngi wad ïa ki phlim jong kiwei, ngi dei ban buh ka thong ba kiwei ki jylla ki wad ïa ki phlim jong ngi ruh” u la ong.
Katba ka Kong Simi kaba dei ka nongshna phlim ka la ïathuh ba ka jingpyni ïa ka phlim ‘Ka Chithi’ ha Library ka dei hadien bym ïoh jaka namar ki dang bun ki phlim kiba dang ap pali ha Bijou Cinema bad Anjalee Gallery.
Namar kata, ka don jingkyrmen ba ki paidbah kin wan ban ai jingkyrshan ïa kane ka phlim ka ban kut haduh ka 12 tarik mynta u bnai.
