Ranchi, Jymmang:
Ka kynhun Enforcement Directorate ka la kem noh ïa u Sanjeev Lal uba long u Personal Secretary jong u Myntri ka tnat ki kam pynroi ïa ki thaiñ nongkyndong ha Jharkhand u Alamgir Alam lem bad ïa u nongïarap hapoh ïing jong u Jahangir Alam ha ka miet jong ka Lah Sngi U Blei hadien ba la ïoh ban kurup ïa ka pisa kaba T. 35.23 klur na ka ïing kaba don ha Ranchi.
U Sanjeev Lal bad u Jahangir Alam ki la shah kem hapoh ka jingtreikam jong ki kyndon ka Prevention of Money Laundering Act (PMLA) ha kaba ki la shah kylli jingkylli bad shah tohkit baroh shimet, la ïathuh ka kyrwoh khubor ba la ïohlum.
Ha ka Lah Sngi U Blei, ka kynhun ED ka la pynlong ïa ka jingleit khynra ha 2BHK Flat kaba don ha Ranchi ha kaba la kynnoh ba ka dei kaba la sah da u Jahangir Alam, katkum ka jingpynlong ïa ka jingtohkit ha kaba ïadei bad ka jingdon jong ka jingjia jong ka jingdon ka jingkamai bymhok ïa ka spah kumba la pynshisha ba ka la mih na ka jingpyndkoh treikam hapoh ka State Rural Development Department.
Ka kynhun ED ka la ïoh ban kurup ïa ka pisa kaba palat T. 32 klur shi bynta T. 3 klur pat la ïoh ban kurup na kiwei pat ki jaka ha kaba la pynlong ïa ka jingleit khynra.
Haduh mynta baroh ka pisa kumba la ïoh jingkheiñ la ong ba ka ka don T. 35.23 klur, la ïathuh ka tyllong khubor.
U Alamgir Alam, u la kyntait ha kaba ïadei bad ka jingleh bakla jong u ha kane ka jingjia.
Ïa ka synduk Steel kaba la dap da ka pisa kaba la ïoh ban kurup la rah noh na kane ka ïing da ki heh jong ka kynhun ED ha ka miet jong ka lah sngi U Blei.
Kane ka jingïoh ban kurup ïa ka pisa ka don ka jingïadei bad ka jingtohkit kaba dang ïai bteng haduh mynta halor ka mukotduma kaba long pyrshah ïa u Virendra K Ram, uba long u Chief Engineer ha ka tnat ki kam pynroi ïa ki thaiñ nongkyndong ha Jharkhand.
U Virendra K Ram u la shahkem hadien ba ka pynlong ïa ka jingleit khynra sha kylleng ki jaka ha ka 21 tarik, Rymphang, 2023, ha Ranchi, Jamshedpur bad ha ki katto katne tylli kiwei pat ki jaka kiba don ha Jharkhand, Bihar bad Delhi.
