Shillong, Jymmang 07
Ka Harijan Panchayat Committee (HPC) ka la ong ba ka Them Ïew Mawlong kam dei satia kaba sah tang ki nongtrei Sorkar hynrei ka dei lang jong ki longïing kiba la sah ha katei ka jaka naduh 200 snem mynshwa.
Ïa kane ka HPC ka la pynpaw halor ka jingkylli ba ki don tang 194 tylli ki longïing kiba trei bad ka Shillong Municipal Board (SMB) bad kiwei ki tnat treikam ka Sorkar kumba ka SMB ka la pyni ha ka jubab ba la pan lyngba ka aiñ ka hok ban tip (RTI Act, 2005) da ka Hynñiewtrep Youths’ Council.
U Secretary ka HPC, u Gurjit Singh u la ong ba ka jaka ha Them Ïew Mawlong kam dei satia kaba sah tang ki nongtrei Sorkar hynrei ka dei kaba ki briew ki la sah ha katei ka jaka da ki spah tylli ki snem naduh 200 snem mynshwa.
U General Secretary ka Delhi Sikh Gurudwara Management Committee (DSGMC), u Jagdip Singh Kahlon uba wan ban ïakren lang bad ka HPC ha ka jingïalang kaba la khot da ka High Level Committee ha Secretariat u la ong ba kam dei ka jingshisha kumba la jubab lyngba ka RTI namar ki 342 tylli ki longïing ki dei kiba ka Sorkar ka la mynjur ïa ka jingdon ki longïing kiba sah ha katei ka jaka.
U la ong ba ha u snem 2007 ka la don ka jingjurip ha ki jingïakren baroh shikatta ka HPC bad ka Sorkar ki la mynjur lang ïa ka jingdon kitei ki longïing.
U Jagdip u la ong ba ha kane ka jingïalang ka jingïakren ka long kaba seisoh bad u kyrmen ba yn sa lah ban pynbeit ïa kane ka kam ha ka jingïakynduh biang sa shisien bad kaba kut artad ha ka taïew banyngkong jong u Jylliew.
U la ong ba katto-katne tylli ki mat la ïakren ha kane ka jingïalang bad la pan por na ka Sorkar sa shisien ban ïoh ïakren biang ïa kine ki mat bad ki para nongshong shnong bad yn sa wanrah biang ïa ka jingïakren ha ka sien ïakynduh kaba kut artad namar ka jingangnud ka long ban pynbeit noh ïa kane ka kam.
