Imphal, Jymmang:
Ka sorkar Manipur ha ka Lah Sngi U Blei ka la pynbna ba kan sa pyllait ïa ka song tyngka kaba la kot sha ka T. 6.90 klur na ka State Disaster Relief Fund (SDRF) na ka bynta ki lanot kiba la shah ktah jur na ka jingwan hap jong u phria.
Ha ka por ba ka la don ka jingïalang bad ki nongthoh khubor ha ka Lah Sngi U Blei, u Myntri Rangbah jong ka Manipur u N Biren Singh u la ong ba ki la don palat 15,425 tylli ki ïing kiba la julor namar ka jinghap ba dang shen jong u phria. Ïa kane ka song tyngka la mang mar T. 50 lak sha ki san tylli ki distrik kiba don ha ki jaka them bad mar T. 40 lak sha ki 11 tylli ki distrik kiba don ha ki jaka lum lyngba ki heh nongpynïaid distrik.
U Biren Singh u la ïathuh ba la don uwei u briew uba la ïap na ka daw ka jinghap jong u phria bad ka jingkhie ka ‘erïong, bad la sakhi ruh ba ki la don bun tylli ki ïing kiba la julor na ka jingshah thombor ha kine ki bor ka mariang.
