Shillong, Jymmang 07
Ka HYC-Sohïong Circle ha ka Sngi Ba-ar ka la leit ban ïakynduh ïa u Sub-Divisional School Education Officer (SDSEO) halor ka jingshah beh kam jong kawei ka nonghikai kaba hikai ha Laitnongkseh L.P. School.
Ka seng hadien ba la ïoh jingujor na ka Kong Tildaris Nongbri halor ka jingshah weng kam jong ka na Laitnongkseh L.P. School, ka la ïakynduh ïa u SDSEO ban pan jingpynshai na u halor katei ka bynta.
“Ngi la buh 3 tylli ki jingdawa hakhmat u SDSEO – ban thung kam biang ïa ka Kong Nongbri kum ka nonghikai ka Laitnongkseh L.P. School, ban pynshitom ïa u ‘Head Teacher’ jong katei ka skul, Bah P. Shylla bad ban pynshai halor ka jingshah weng kam ka Kong Nongbri,” la ong u General Secretary ka HYC-Sohïong Circle, Bah Hamarbamut Thabah haba kren sha ki lad pathai khubor hadien ka jingïakynduh bad u SDSEO.
U la ïathuh ba ka Kong Nongbri ka la pyntip sha ka seng ba kam shym la ïoh tulop mynta la kumba 8 snem eiei naduh ba ka la sdang ban hikai ha katei ka skul naduh ka 15 tarik u Rymphang, 2016.
Ïa ka Kong Nongbri, la ai jingmut da ka MC jong katei ka skul ban rung kum ka nonghikai.
“Haba ïadei bad kane, ngi dap da ka mynsiem ba sngewkhia khamtam ba ka dei ka ‘riewkynthei. Ka la don ruh ka jingdawa pisa da utei u ‘Head Teacher’ haduh ` 50,000 na ka Kong Nongbri ban pynbit pynbiang ïa ki kot ki sla khnang ba un ïoh pynrung ïa ka kum ka nonghikai,” la ong u Bah Thabah da kaba bynrap ba ka Kong Nongbri ka la dep siew ` 10,000 sha utei u ‘Head Teacher’.
Halor katei ka jingkynnoh pan pisa, ka seng ka la dawa na ka ophis u SDSEO ban pynshitom ïa utei u briew kumjuh ban siew lut ïa ka tulop jong ka Kong Nongbri naduh u snem 2016 na ka tulop u Bah Shylla.
“Lada ka ophis SDSEO kam lah ban pynshitom ïa u, ka seng kan sa shim da kiwei pat ki sienjam pyrshah ïa u,” u la ong.
“Halor ka jingong jong u ba kim biang ki kot ki sla bad ym lah pynrung kam nonghikai – naduh katei ka snem (2016) kaba ka (Kong Nongbri) la pynïasoh, ym pat donkam ïa ka MTET, hynrei ha katei ka por la donkam ïa ka D.El.Ed ïa kaba ka Kong Nongbri ka la pyndep,” la ong u Bah Thabah.
U la ïathuh ba u SDSEO u la kular ban sa shimkhia ïa katei ka kam bad ban pynsngew sha ki bor ba halor kumjuh ban pan jingpynshai na utei u ‘Head Teacher’ bad ban wad ki lad lyngba ka lynti kaba dei kumno ban ïarap ïa ka Kong Nongbri.
Shuh shuh utei u nongïalam u la bynrap ba ka Kong Nongbri ka la ïoh jingtip ba ka la shah weng kam tang haduh mynta u snem bad kaei kaba kham lyngngoh ka long ba ka kyrteng jong ka kam pat rung ha ka thup kyrteng kum ka nonghikai.
