Aizawl, Jymmang:
Da ka jingdon shuh sa kumba 50 ngut ki poiwir kiba la leit sha Mizoram na Myanmar, la ong ba ki la don baroh kumba 34,332 ngut ki nong Myanmar kiba la ïoh jaka sah ha ka jylla haduh mynta, la ïathuh ki heh sorkar ha ka lah sngi U Blei.
Ki heh jong ka sorkar Mizoram ki la ong ba ki la don sa kumba 50 ngut ki nong Myanmar, kynthup ïa 10 ngut ki longkmie, kiba la phet shnong na Paletwa kaba don ha marjan jong ka thaiñ Chin bad ka ri bad ki la rung ha ka shnong Hruitezawl kaba don ha Lawngtlai distrik jong ka Mizoram ha kine ki khyndiat sngi ba la leit khnang ban lait na ka jingshah pynrung dkhot ha ka kynhun lehnoh jong ka Arakan Army (AA).
Wat lada kam don hapoh ka Rakhine ha Myanmar, ka kynhun lehnoh Arakan Army ka ju pynjur ïa ki kam pyntriem ha ka ri, ha kaba ki briew kiba la shah pynrung dkhot na ka thaiñ Chin ki la pynkhlaiñ kumno ban lah ban ïakhun pyrshah ïa kine ki lehnoh.
“Ki samla ha Myanmar ki bym kwah bad kiba shah pynbor ban rung dkhot hapoh ka kynhun lehnoh Arakan Army ki ju phet shnong sha Mizoram,” la ïathuh ki heh sorkar.
Hashwa kane, ka jingdon jong kine ki poiwir kiba na Myanmar ka la long 34,282 ngut ha kaba ki la ïoh jaka sah ha ki 11 tylli ki distrik jong ka Mizoram ha ki bynta bynta hadien ba ki lehnoh ki la knieh jubor ïa ka jingsynshar ha kane ka ri bamarjan ha ka 1 tarik, Rymphang, 2021.
Kumba ka long mynta, baroh ki nong Myanmar kiba la shong shnong ha kane ka jylla ki la don 34,332 ngut, kynthup ïa 10,900 ngut ki longkmie bad 13,310 ngut ki khynnah, kine ki shong ki sah ha ki jaka sah ba shipor ha Mizoram, katba kiwei pat ki dang sah bad ki bahaïing jong ki ne don ruh kiba shu shong wai.
Nalor ki nongshong shnong jong ki nong Myanmar, ki la don kumba 10,000 ngut ki rangbah, kynthup ki longkmie bad ki khynnah kiba la ïoh jaka sah ha ki jaka sah ba shipor ha Mizoram hadien ba ka la khie ka jingïakynad kaba jur ha ka jylla ba marjan ha Manipur ha u bnai Jymang jong u snem ba la lah.
Nalor kane, ki la don ruh kumba 1,167 ngut ki briew na ki thaiñ Chittagong Hill ha Bangladesh kiba la sah ha Mizoram naduh u snem 2022.
