Shillong, Jymmang 07
U Bah Titosstarwell Chyne uba dei u CEM barim ka KHADC bad u MDC ka UDP na Sohra constituency, u la ai jingkyrshan ïa ka rai jong u Myntri ka tnat Social Welfare ka Sorkar Jylla u Bah Paul Lyngdoh ban nym ithuh Schedule Tribe shuh ïa ki Khasi kiba ai jait sha u kpa namar ha ka jaidbynriew Khasi la ai jait sha ka kynthei.
U Bah Titos u la ong ba kane ka jingshim rai u Myntri ka tnat Social Welfare ka dei ha ka por ba u long CEM ka KHADC u la phah shithi ha ka 8 tarik Jymmang 2023 sha u Under Secretary ka tnat Social Welfare ka Sorkar Jylla ban pyntip ba katkum ka Khasi Hills Autonomous District (Khasi Social Custom of Lineage) Act 1997 ka jaidbynriew Khasi ka shim jait na ka kmie bad kam shah ban shim jait na u kpa.
U la pyntip ba lada don ka jingïashongkha khleh kata lada u kpa u dei u Khasi bad ka kmie ka dei na kawei ka jaidbynriew; kaba mut ba ki khun ki hap ban ai da kawei ka jait da kaba leh ïa ka tangjait hynrei ki khun kim lah ban ai jait sha u kpa.
U la ong ka Lineage Act kam shah ïa ka kynthei na kawei ka jaidbynriew ba kan ai jait sha u shynrang lada ki la shongkha. Kumta u la kyrpad ban pyndam noh ïa ka rai kaba la pynmih ha ka 21 tarik Naitung 2020 ban ithuh Schedule Tribe ïa ki Khasi kiba ai jait kpa.
U Bah Titosstarwell u la ong ba ka jingkyrshan jong u ïa ka rai kaba u Myntri ka tnat Social Welfare u Bah Paul Lyngdoh ka long ba ki Khasi ki dei ban shim jait sha ka kmie katkum ka riti dustur khnang ban ïoh ïa ka Schedule Tribe.
Kumba mih ha kine ki sngi ba ïa kane ka jingai jait kmie ne jait kpa ban ïoh Schedule Tribe donkam ban ïatai ha KHADC, u Bah Titosstarwell u la ong ba ïa kane ka kam ym donkam shuh ban ïatai namar la don lypa ka aiñ ha ka Lineage Act.
