Shillong, Jymmang 07
Ka Integrated Command & Control Center (ICCC) hapoh jong ka Shillong Smart City Project ba la bei tyngka da ka tnad Housing & Urban Affairs, ka Sorkar India, shen yn sa pyndep noh bad la mang T.151.77 klur na bynta ka ICCC baroh kawei bad ym kumba la kam da ka jingthoh ha ka rynsan lad pathai kaba kdew ba T. 150 klur ka dei na bynta 300 tylli ki CCTV.
Ka ICCC kaba la pyntreikam ha kylleng ka nongbah hapoh jong ka Shillong Smart City Project ka kynthup ïa ka ‘ICCC Building’, ‘ICCC Platform’ lem bad kiwei-kiwei ki ‘Software’, ‘Data Centre’ (DC) bad ‘Radio Frequency Network’ (RF NW).
Nalor kitei ki bynta ba kongsan ba la kdew haneng, ka sor Shillong kan sakhi ïa ka roi ka kiew ha ki kor teknoliji lyngba ka jingpyndait ïa ki tiar ba kynthup kum ïa ka CCTV Camera (Na bynta ban peitngor bad jingpynïaid kali)-368 tylli, Emergency Call Box (ECB)-42 tylli, Public Address System (PAS)-58 tylli, Variable Message Displays (VMDs)-20 tylli, Streetlight (LED / Smart Lights with Light Point Controller, LPC)-300 tylli, Public Wi-Fi Hotspots-60 tylli, ka kali ba la pyndait GPS ban buddien na bynta ka Solid Waste Management (SWM) kali-50 tylli, bad Smart Bins-200 tylli.
Ka ICCC kaba dei ban long ka jabieng na bynta ka jingpynwandur ïa ka sor bad ki jingtreikam jong ka, kan long ka jaka pdeng na bynta ki jingtreikam bapher-bapher ba kynthup ïa ka jingpeitngor, jinglum jingkheiñ, ban jubab ïa ki jingtreikam na bynta ki kam ba kyrkieh bad ki ‘app’ halor ka ‘Smart City’.
Kane ka long katkum ka kyrwoh na u Executive Director ka Shillong Smart City Project.
