Jerusalem, Jymmang:
Ka tnat shipai Israel ha ka Lah Sngi U Blei ka la pynkynriah ia palat 1,00,000 tam ki nongshong shnong ka Rafah jong ka nongbah Gaza kum shi bynta ba kan ioh leit hiar thma bad pynum syndon ia katei ka thaiñ. Nalor nangta ka Israel ka la iathuh ba kiba bun ki dkhot jong ka Hamas ki rieh tngen ha katei ka bynta jong ka nongbah Gaza namar kiba bun ruh ki paid nongshong shnong ki rieh tngen ha katei ka jaka bad kumta la ong ba ki lehnoh Hamas ki pyrshang ban iada ialade da kaba rieh ha katei ka bynta kaba shong ki riew paidbah bad khnang ruh ba ka Israel kan ym leit hiar thma sha katei ka bynta.
U heh ka tnat iada ka Israel u la iathuh ba kin don beit da kumno- kumno kumba 1,00,000 tam ki paid nongshong shnong kiba ka Israel kan hap ban pynkynriah lut baroh na Rafah.
Namar kumba la ju tip da ka Israel, ki don kumba 1.2 Million ngut ki paid nongshong shnong ka Gaza kiba la leit ban shong bad phet sha katei ka nongbah Rafah namar ka thma jong ka Israel ka kham jur sha kiwei ki bynta jong ka nongbah Gaza bad ka Israel kam ju kham pynthud ia katei ka thaiñ kaba ki shong ki riew paidbah baroh shi katta. Hynrei, ha kane ka sien pat ka Israel ka la rai ban leit thombor sa ha katei ka bynta jong ka nongbah Gaza khnang ba kan ioh ban pynkhyllem ia baroh kito ki dkhot jong ka Hamas kiba shong rieh ha katei ka bynta.
Namar la ong ruh ba ka Israel ka la iohi ba ki dkhot ka Hamas ki treikam sop-sop na katei ka bynta jong ka nongbah Gaza bad kumba la iohi ha ka sngi ba la lah ba ki lehnoh Hamas ki ther bom bad ther ‘namding sha Israel dei na katei hi ka nongbah Rafah bad kumta ka Israel ka la ong ba kam long shuh ban dang ailad ia ka Hamas ba kan treikam na katei ka thaiñ namar kan long pat ka jingma ia ka Israel bad ia ki shnong jong ka Israel kiba don ha khappud bad hajan jong katei ka thaiñ.
Ki heh shipai ka Israel ki la iathuh ba katei ka jing pynkynriah noh shuwa ia ki paidbah na katei ka bynta jong ka Gaza, kan long ban pyllait ia ki paidbah na ki jingma jong ka thma bad khnang ba kin lait ban shah ktah na ki bom bad ki ‘namding ba ka Israel kan ther sha katei ka bynta.
Ha ka Sngi U Blei, 3 ngut ki shipai ka Israel ki la kylleng iap, ha kaba 12 ngut pat ki la mynsaw na ka jingleit ther bom jong ki lehnoh Hamas kiba don na katei ka thaiñ Rafah bad ki ther bom sha ki thaiñ khappud jong ka Israel sha Kerem Shalom kaba long ka bynta khappud ban rung bad mih na Gaza sha Israel.
Kumta, ki heh ka Israel ki la iathuh ba dei na ka daw jong katei ka jingjia ba ka Israel ka la hap ban khang noh shipor ia ka jingrung- jingmih bad ka jingpynpoi ia ki lad jingiarap sha ki paid nongshong shnong ka Gaza lyngba jong utei u khappud ka Israel bad Gaza, kaba la shah pyn julor ha ki ‘namding jong ki lehnoh Hamas ha katei ka Sngi U Blei.
