Shillong, Jymmang 07
Ki bahaïing lem bad ka kur ka jait jong u Samborlang Rynjah ki la rai ban phah ïa une u rangapkol ba dang 6 snem ka rta sha ka shlem ai jinghikai kynjatbol jong ka Minerva Football Academy kaba don ha Punjab.
Kane ka long hadien ki bahaïing ki la ïakynduh lang myn ha ka sngi Saitjaiñ na ka bynta ban pyrkhat sani bha khnang ba ka lawei u Samborlang ha ka kam ïalehkai kynjatbol kan ym long kaba lehnohei.
Wat la utei u heprit u long uba dangrit ka rta, pynban ka sap kaba kyrpang ka la paw shynna ha u kum u rangapkol ba kynsai. Kane ka sap kaba kyrpang jong u ka la saphriang ha kylleng jong ka ri India bad ha ka pyrthei hi baroh kawei.
U Samborlang uba na ka shnong Mawryngkneng u la lah ban pynpaw ïa ka sap kaba kyrpang jong u da kaba u la ïalehkai kynjatbol tang ha phyllaw ïing bad la ki para khynnah lem bad ki hynmen.
Naduh ba u dangrit, une u heprit uba dei u khun ba-ar jong i Kong Kyntiewlang Rynjah bad Bah James Sunn, u don ïa ka jingthrang bad ka jingangnud ba u kwah ban long kum u khlur apkol ka Argentina u Emiliano Martinez, uba la ïohpdiang ïa ka khusnam Golden Gloves ha ka FIFA World Cup 2022 kaba la long ha Qatar.
Na ka liang U Nongsaiñ Hima u la ïoh ban sakhi ïa ka sap kaba kyrpang jong u Samborlang mynba u ïalehkai ha phyllaw ïing. Wat la u hap ban kynthih ban kem ïa ka bol, hynrei um don jingtieng ban synrud ïalade ha ki maw ki dieng hapoh madan namar ka jingangnud hi ka long ban long kum u rangapkol ba kynsai ha ka lawei ka ban wan.
“Nga jied ban apkol namar nga thrang ban long kum u khlur apkol ka Argentina u Emiliano Martinez,” la ong u Samborlang.
Na ka liang ka Kong Kyntiewlang ka la pynpaw ka jing-angnud ba u khun jong ka un ïoh ka jingshah hikai kaba paka namar u don ïa ka sap ïalehkai ba kyrpang naduh ba dangrit. “Wat la ki don bun ki klob kiba la kwah ïa u, hynrei ngi la rai ban phah sha ka Minerva Academy namar ka la wan ban tyrwa hi dalade. Te kumta nga kum ka kmie nga kwah ban phah ïa u sha katei ka shlem ai jinghikai khnang ba un ïoh ka jingshah hikai kaba paka ha ka kam ïalehkai phutbol.”
Kat kum ka jingïathuh jong ka la sngewthuh ba kum ka ïing ka sem ki kwah ban phah lang bad uwei u hynmen arkmie u Banshailang Rynjah sha Punjab khnang ba u Samborlang un ym sngewpher haba u don jngai na la ki kmie ki kpa bad bahaïing hasem. Te kumta ïa mynta ki dang hap ban pyndep ïa baroh ki jingdonkam na ka bynta jong u bad kum ka ïing ka sem hi baroh kawei ki da khmih lynti ba un long kum u khlur ïalehkai ba kynsai ha ka lawei ka ban wan.
Lah ban pynkynmaw ba kane ka jingpaw utei u heprit ha ka kam apkol ka dei lyngba ka jingsaphriang ka dur-khih jong u ha ki rynsan social media. Ym tang kata, hynrei kine durkhih ki la poi shaduh u khlur apkol ka Argentina, u Emiliano Martinez. Kumta une u khlur apkol u la buh ïa katei ka dur-khih jong utei u heprit hapoh ka sla instagram ka jong u bad dei hangne da ki million ngut ki briew ki la sakhi ïa katei ka sap ba kyrpang jong utei u heprit uba na Mawryngkneng.
