Shillong, Jymmang 07
Ka khubor na ki pulit ba la ïoh lum ha ka Sngi Ba-Ar ka ïathuh ba u Company Commander ka 110 Battalion, BSF (Ryngku Border Outpost, East Khasi Hills), u la ujor ba ha ka 1 tarik Jymmang ha ka por kumba 2:30 nohphai sngi, ki BSF ki la ïohi ïa ka jingïaid jong ki briew kiba don kumba 40-50 ngut ïa kiba la suba ba ki dei ki nongkhaïi be-aiñ ha baroh arliang jong u khappud.
Ha ka jingujor, utei u Company Commander u la ong ba kitei ki briew ki la kawang maw ïa ki BSF. Namar ka jingshah kawang maw, u Company Commander u la ong ba ki BSF ki la hap ban siat kuli sha suiñ bad dei na kane ka daw, kitei ki briew ki la hap ban phet noh na katei ka jaka.
Hadien ba ki la phet krad, ki BSF ki la lap ïa uwei u muid na katei ka jaka.
