Shillong, Jymmang 07
Ka Rangdajied United FC ka la long ka kynhun kaba nyngkong eh ban jam sha ka final ha ka lympung ïalehkai Shillong Premier League 2023 hadien ba ka la lah ban pynliem noh ïa ka Shillong Lajong FC da 1-0 kol ha ka jingïakhun semi final kaba la long ha ka sngi Ba-ar ha SSA Stadium kaba ha First Ground, Polo.
Kane ka jinglah ban pynthikna ka la wan urlong lyngba u Arlangky Nongsiej uba la ïoh ban thep lyngba ka penalty ha ka minit kaba 31.
Kumba ka paw ha ka jingïalehkai ba la lah (league) myn ha ka 13 tarik u Ïaïong, ka Rangda-jied ka la lah ban pynliem ïa ka Lajong da 2-1 kol.
Te kumta ka Rangdajied kan sa tip ïa ka kynhun ka ban ïakhun pyrshah ha ka final ka ban long ha ka sngi Saitjaiñ ha kaba ka lahduh jong ka aïom ba la lah, ka Mawlai SC kan ïakhun pyrshah ïa ka Langsning FC ha ka semi final kaba ar.
Ha kane ka jingïakhun ka Rangdajied ka la lah ban pynpaw ïa ka jingtbit ha kaba ka la ïakhun tyngeh naduh kaba sdang bad ka la lah ban pynurlong na ka bynta ban khur ïa ka jingjop. Katba ka Lajong ka la pynmih khambun da ki rangïalehkai kiba dangkham khynnah, katba kiwei pat ki rangïalehkai (senior) ki la hap ban shongben na ka daw ba ki dangdon hapdeng ki jingmynsaw.
Ka jingpynur u Henry Nongneng ïa u Robert Khongjoh hapoh ‘box’ ha kaba ka la pynlong ïa u rephri ban kdew beit sha ka penalty. Te kumta u Arlangky um shym la pynlehnohei ïa kane ka kabu ksiar kaba u la ïoh ban shut ïa ka penalty ha kaba u rangapkol ka Lajong u Wanteilang Malngiang um shym la lah ban khanglad na ka jingshah thep.
Kham hashwa u Dibormi Kassar u la ïoh ban shut ha ka minit kaba 2, hynrei u Henry u la lah ban khanglad. Te kumta ka Lajong ka la pyrshang ban ïakhun tyngeh na ka bynta ban ïoh thep kol lyngba u Deibormame Tongper (uba la thep haduh 8 kol ha kane ka aïom), hynrei une u rangïalehkai um shym la lah ban pynurlong. Hadien katto katne por u Rimankhraw Kharumnuid u la ïoh ia kabu kaba biang, hynrei u la shah khanglad noh ha u rangapkol ka RUFC u Banshanskhem Kharsyntiew.
Hadien ba la bteng biang ïa ka jingïakhun jong ka kylla miet, ka Lajong ka la ïakhun tyngeh na ka bynta ban thom naphang, hynrei ki rangïalehkai ‘dien ka RUFC ki la lah ban ïashan tyngeh ban pyllait na ka jingshah thep ha ka liang pyrshah.
Hashwa ban wai ka Lajong ka la ïoh biang ïa ka kabu ksiar lyngba u Henry, hynrei une u rangïalehkai um shym la lah ban pynurlong bad ha kaba kut ka Lajong ka la hap ban mad ïa ka jingshah rem.
