Shillong, Jymmang 07
U Myntri Rangbah, u Conrad K Sangma, ha ka Sngi Ba-Ar u la pyntip ba ka sorkar jylla kan ïakren bad ki bor ba dei khmih ha kaba ïadei bad ka jingdon ka jingbym ïaid beit ha ka jingpynlong ïa kane ka eksamin ha ki bynta bapher-bapher jong ka jylla.
Haba kynthoh ha rynsan ‘X’, u Conrad u la ong, “Ïa ka eksamin NEET la pynlong da ka National Testing Agency (NTA). Ha kaba ïadei bad ki jingpynsngew ba ka don ka jingbym biang ha kane ka eksamin ha ki bynta bapher-bapher ka jylla, ka sorkar jylla kan ïakren bad katei ka tnat (NTA).”
Lah ban kdew ba ha ka eksamin NEET kaba dang shu dep shen, ki la don ki samla kiba la ïakhun kiba la pynpaw ba ka don ka jingbym biang ha ka rukom pynïaid ïa katei ka eksamin bakongsan.
