Shillong, Jymmang 07
U Symbud Myntri Rangbah ka Jylla, Bah Prestone Tynsong u la ong ba ka Sorkar Jylla kan sa shong biang sa shisien kaba dei ka jingïakynduh kaba khatduh halor ka jingpynkynriah shawei pat ïa kiba sah ha Them Metor bad u la ong ba yn nym sngap ïa ki jingkren da kumwei pat hynrei ka nongrim ka long ban pynkynriah beit kumba la rai.
Haba ïakren bad ki nongthoh khubor hadien ka jingïalang jong ka Sorkar bad ka Harijan Panchayat Committee (HPC) ha Secretariat ha ka Sngi Ba-ar, u Bah Prestone u la ong ba ka nongrim jong ka jingïakren ka long ban pynkynriah ïa kiba sah ha katei ka jaka bad ïa kiba shong beaiñ yn nym ai jaka satia.
Kumta ka jingïakynduh kaba khatduh bad ka HPC kan dei ha ka 7 tarik u Jylliew namar ka HPC ka la pan por sa tang shisien ban ïakren pynbeit para ma ki bad yn sa shim ïa ka rai kaba khatduh.
Haba kylli halor ka jingpynkynriah ïa ki 342 tylli ki longïing bad ka jingpaw lyngba ka RTI ba ki don tang 194 ngut kiba trei bad ka Shillong Municipal Board (SMB), u Bah Prestone u la ong ba ka tnat Urban Affairs bad MUDA kin khmih bniah ïa ki kot ki sla kiba la ïoh na ka SMB bad kumjuh ruh ki kot sla kiba don bad kine ki ar tylli ki tnat namar ka la don ruh ka jurip ha u snem 2007.
U la ïathuh ba u Director ka tnat Urban Affairs bad Chief Executive Officer (CEO) ka Shillong Municipal Board (SMB) ki la shong bishar bad pynthikna mynta ïa ka jubab RTI jong ka SMB kaba la ai sha ka HYC kaba ong ba ki don tang 194 ngut ki nongtrei Sorkar napdeng ki 342 tylli ki longïing kiba don ha Them Metor.
“Mynta ka sngi ngi la ïakren ïa ki katto-katne ki mat kiba kongsan haba ïadei bad ka jingpynkynriah ïa ki longïing. Shisien ba ngi la rai ban pynkynriah kamut ka dei kaba shirta,” la ong u Bah Prestone.
U Bah Prestone u la pyntip ba ka la don ka jingpluh ding kaba shyrkhei ha u snem 1996 ha kaba bun ki ïing ki la ing bad julor bad ha kane ka jingjia, katto katne ki kot ki sla ruh ki la jah. Kumta namar kane ka jingjia, u Director ka tnat Urban Affairs ha u snem 2008 bad 2009 u la ai jingbthah ïa ka MUDA ban pynlong biang ïa ka jurip kaba thymmai ha ka jingïadonlang kito ki longïing ha Them Metor, ïa kaba ki la dep leh.
“Haba pynshong nongrim ïa ka RTI ba jubab da u CEO ka SMB, ngam pat lah ban ong eiei mynta namar ka MUDA bad Urban Affairs ki dang shong bishar ban pynthikna ïa ki kot ki sla,” u la ong.
U Bah Prestone u la ong ruh ba kiba trei bad ka SMB ne kiwei pat ki tnat treikam ka Sorkar ki don ruh la ki jong ki bahaïing hynrei ka Sorkar kam lah ban kynthup lang ïa ki briew ba shu shong beaiñ haba pynbeit ïa kane ka kam.
Kumta u la bynrap ba ka Sorkar ka la ïeng skhem ha ka rai ban pynkynriah ïa ki 342 tylli ki longïing na Them Metor.
