Bengaluru, Jymmang:
U Myntri Rangbah jong ka Karnataka u Siddaramaiah ha kine ki khyndiat sngi ba la leit u la ong ba u Narendra Modi un ym ïohlong Myntri Rangbahduh shuh bad ka la don mynta ka jingpyrshah jur ïa u Modi ha kylleng ka ri. “Wat ki briew jong ka BJP ruh ki la tip halor kane.
Ka jingshahrem jong ka seng BJP ka la dei ban urlong,”u la ong. Kum shi bynta ban leit ïalap ilekshon na ka bynta ka kyrtong jong ka seng Congress ka Dr Prabha Mallikarjun kum shi bynta jong ka ‘Prajadhwani-2’ ha Harihar bad Honnali Assembly konstitwensi jong ka Davanagere Parliamentary konstitwensi, u la ong ba ki la don kumba 25 ngut ki MP jong ka seng BJP kiba la shahjied na ka jylla ha u snem 2019 kim ju buh jingkylli ha kaba ïadei bad ka jingbym treihok jong ka Parliament shabar ka Karnataka, ne ban pynsngew ïa ki mat ba ïadei bad ka Karnataka.
Kum ka jingithuh ba kan sa don ka jingai jubab na ki nongthep vote, ka seng BJP ka la pynkylla ïa kiba bun ki MP ha kane ka por ba mynta. Hynrei kiba dang thymmai ruh kin ym jop mynta, u la bynrap.
U la ong ba ka sorkar Congress ka la trei bad kren ban pynpaw ïa ki mat ba kongsan bad ki sakhi halor ka jinglah ban pynurlong ha ki san snem hapoh ki 8 bnai kan sa pynlong ban wan ha ka bor synshar.
“Ha ka por jong ka jingsynshar jong nga, nga la ai ïa ki nongrep ka Anna Bhagya, Ksheera Bhagya, la ai ïa ka rai ban map ïa ka ram ki nongrep, ka Indira Canteen na ka bynta ki briew kiba duk, ka Shoe Bhagya bad ka Shaadi Bhagya, kine baroh ki long na ka bynta ka jingmyntoi jong ki briew ki baduk,” u la bynrap.
U la ong ba hadien ka ilekshon Lok Sabha, ka sorkar kan sa pyntreikam ban kyntierw ïa ka Irrigation Project ka ban lah ban sam ïa ka um sha ka 5,000 hectares ha Harihar.
U la ong ba ka seng BJP ka la pynsniewdur ha ka jingphiah ha ka synshar-khadar, klet ïa ka jingmyntoi jong ki riewpaidbah.
U Modi u la ong ba ka seng Congress ka la knieh noh ïa ka bhah ba kyrpang na ka bynta ki Dalit bad ki Backward Classes bad ai ïa ka sha ki Muslim, ha kaba kane ka la dei ka kam thok kaba shyrkhie.
“Haduh mynta, ngam pat ju ïohi Myntri Rangbahduh u ban thok ban shukor kum ma u. U la pyrshang ban wanrah ka jingïapait hapdeng ki Muslim bad ki Dalit, ki Backward Class bad ki Dalit,” u la ong.
