Bhopal, Jymmang:
U nongïalam jong ka seng Congress u Rahul Gandhi ha ka lah sngi U Blei u la pynshisha da kaba ong ba ka kynhun NDA hapoh ka jingïalam jong ka seng BJP kan ym ïoh ïa ka jingjop wat tang ha ki 150 tylli ki konstitwensi ruh ha ka jingïakhun ïa ka ilekshon Lok Sabha bad kata kane ka ilekshon ka don jingthmu na ka bynta ban ïada ïa ka Riti synshar ha kaba ka seng BJP bad ka RSS ka la kwah ban pynkylla.
Ha ka jingai jingkren ha ka jingïalang paidbah kaba la long ha Jobat kaba don ha Alirajpur distrik hapoh ka Ratlam-Jhabua Lok Sabha konstitwensi ha Madhya Pradesh, u Gandhi u la ong ruh ba ka sorkar Congress kan sa pynthikna ha ka ban ai ka jingpyrkhing kaba 50 per cent halor ka jingbhah katkum ka jingmyntoi jong ki riewpaidbah.
U President barim jong ka seng Congress sa shisien pat u la kren halor ka jinglum khana samari halor ka jingdon jong ki jait bynriew, ha kaba u la ong ba baroh kiei kiei shaphang ka jinglong kyrpang jong ki briew bad halor ka jingpynkylla ïa ki rukom treikam ha ka saiñ pyrthei ha ka ri.
“Ki nongïalam jong ka seng BJP ki la pynshai da kaba ong ba ki la thmu ban pynkylla ïa ka kot, kata ka Riti synshar. Ki la buh da ka kyntien ban pyrta ‘abki baar, 400 paar’. Ieh noh sharud ïa ki 400, kin ym ïoh ïa ka jingjop wat tang ha ki 150 tylli ki konstitwensi,” la pynshisha u Gandhi.
“Kine ki ilekshon Lok Sabha ki dei na ka bynta ban ïada ïa ka Riti synshar ha kaba ka seng BJP bad ka RSS ki la kwah ban pyndam noh, bad ban pynkylla bad bret noh ïa ka,” u la pynshisha shuh shuh.
Ka seng Congress bad ka kynhun synrop jong ki seng ka liang pyrshah ka INDIA ki la ai ka jingïada na ka bynta ka Riti synshar, u la ong.
“Ka dei namar ka Riti synshar ba ki riewlum, ki Dalit bad ki OBC ki ïoh jingmyntoi. Ki riewlum ki la don ka hok halor ka um, ka khyndew bad ki khlaw namar ka jingdon jong ka Riti synshar,” la ong shuh shuh u Gandhi.
