Shillong, Jymmang 08
Ka Education Cell ka FKJGP Sengkmie bad ka KSU Sengkmie ka la ai khublei ïa baroh ki khun samla ka bri u hynñiewtrep kiba la pass bad ïoh kheit ïa u soh ka jingjop ha ka eksamin HSSLC Science bad Commerce Stream hadien ba la pynbna risol da ka Meghalaya Board of School Education (MBoSE) ha ka Sngi Balang.
Ha ka kyrwoh khubor na u Education Secretary ka FKJGP u samla Pynshai Kharbani u la ong, kane kam pat dei kaba kut hynrei ki dang bun ki mawjam ba kin dang hap ïaid shakmat ban poi sha ka thong jong ka jingjop.
Nalor nangta, u la ong ka seng ka ai jingkyrkhu jingkyrdoh bad kitbok-kitrwiang ïa baroh ba kin nang ïai trei shitom ha ki jingïaid lynti jong ki ha ki kyrdan pule bapher-bapher. Khatduh khatwai ka seng ka kitbok- kitrwiang ruh ïa kiba dang ap ïa ka risol ha kiwei pat ki bynta kum ka HSSLC Arts bad SSLC ba ki ruh kin ïoh ïa u soh babha.
Ha kawei pat ka khubor, ka KSU lyngba u Chairman ka Education Cell ka pynpaw ruh ka jingkhublei ba kyrpang sha kito ki samla kiba la ïoh kheit ïa u soh ka jingjop da kaba wan kham shakhmat ha ki kyrdan bad ha ki sobjek ba ki pule. Ka jingïoh ban kheit ïa u soh ba thiang ha kane ka kynti ka long ka jingkmen ym tang ïa ki samla ïakhun hynrei ïa ka ïing ka sem, ka shnong ka thaw, ka ri bad ka jaidbynriew hi baroh kawei. Ka Seng ka da sngew sarong shikatdei eh ban ïohi ba ki khun samla ka jaidbynriew ki wan shakhmat ha ka jingpule jong ki, namar ka jingnang jingstad, ka jingtip jingshemphang ka dei ka atiar ba khraw ban ïada, ban pynneh pynsah bad ban kyntiew ïa ka ri bad jaidbynriew ha baroh ki liang.
Ha kajuh ka por, ka seng ka kitbok-kitrwiang sha kito ki samla ki bym shym la poi sha ka thong ha kane ka kynti, ba kim dei ban duh jingkyrmen, pynban, ba kin nang ïai trei shitom ba kin lah ban leh bha ha kawei pat ka kynti bad ba kin kynmaw ba ka jingshahrem kam dei ka lad ba khatduh hynrei ba kan long u mawjam sha ka thong jong ka jingjop.
Ka Seng ka kitbok-kitrwiang sha baroh ki samla ki ban sa ïoh ïa ka risol HSSLC Arts Stream bad ka SSLC ha kine ki sngi ki ban sa wan ba kin ïoh ban kheit ïa u soh ka jingkmen u ban long ka jingsarong ïa ka ri bad ka jaidbynriew hi baroh kawei.
