Shillong, Jymmang:
Ka Akhil Bharatiya Vidyarthi Parishad (ABVP), Meghalaya ka pynpaw ka jingsngewkhia halor ki jingbakla ba dang shen haba ïadei bad ka eksamin NEET-UG, 2024 kaba la long ha Jowai Centre, khamtam ha St. Mary’s Mazzarello Girls’ Hr. Sec School.
Ki kyrtong ha kane ka jaka thoh eksam ki la mad jingeh shi kat dei hadien ba la sam ïa 2 jait ki jingkylli kiba kdew – (1) QRST bad (2) MNOP, kiba pynpaw ïa ki thup jingkylli kiba ïapher bak-ly-bak.
“Kane ka jinglong-jingman ka bym shym la khmih lynti ka la wanrah ïa ka jingkhuslai bad jingkulmar jingmut hapdeng ki kyrtong ïakhun eksamin,” la ong ka kyrwoh na ka seng.
Ka seng ka la ong ruh ba ki ‘Invigilator’ kim shym la lum wat ïa ki ‘Admit Card’, kaba ju long katkum ka kyndon man u snem.
Hadien ba ki samla pule ki la kylli pyrthew, ki la ïoh jingtip ba kane ka dei ka rukom thymmai, hynrei hadien haba bun na ki kyrtong ki la poi ïing ynda la dep thoh ïa ka eksam, la phah wan biang ïa ki ban aiti ïa ki ‘Admit Card’ sha ka jaka thoh eksam, ha kawei ka liang kaba la nang pynkhuslai bad pynkulmar jingmut shuh-shuh ïa ki samla pule.
Haba ïadei bad kane ka bynta, ka ABVP ka kyrpad ïa ka National Testing Agency (NTA) ban pynshai mardor haba ïadei bad ka nongrim jong ka jingsam ïa ar jait ki jingkylli na bynta kajuh ka eksamin.
Na ka liang ka seng ka pan jingpynshai ruh halor ka jinglong shisha jong kitei ki jingkylli bad kyrpad jur ïa ka NTA ban batai shai kano ka jingkylli kaba dei bad kano kaba lait.
“Lada jia ba baroh 2 tylli ki jingkylli kiba la sam ha Jowai Centre ki ïapher, ka ABVP ka kyrshan ïa ki kyrtong ba shah ktah ba ki dei ban ïoh lad ban thoh biang ïa ka eksamin. Kaba kum kane ka sienjam ka long kaba donkam eh ban pynneh ïa ka jinglong hok bad jingbym shah liang jong ka rukom pynïaid eksam ka NEET-UG 2024,” ong ka seng.
Shuh shuh ka ABVP ka kyrpad ïa ka NTA ban pynsted ïa ka jubab jong ka bad ban leh ïa kaba donkam haba ïadei bad katei ka bynta ba kongsan.
