Shillong, Jymmang 08
Hadien ba la pass ïa ka eksamin Class-XII, ki samla mynta ki hap bunkam bad pynlut por sa ban ïakhun ïa ka eksamin Common University Entrance Test (CUET) na ka bynta ki samla pule Under Graduate (UG) ba kin ïoh leit pule kham shalor.
Ka National Testing Agency (NTA) kan pynlong ïa ka CUET na ka bynta kiba la pass ïa ka eksamin Class-XII bad ïa kane ka eksamin CUET yn pynlong ha baroh kawei ka ri hapdeng ka 15 tarik bad 24 tarik mynta u Jymmang.
Kumba 13.48 lak ngut ki samla pule kin ïakhun ïa ka CUET ha kylleng ki jaka thoh eksamin kumba 350 tylli ki nongbah kynthup shabar India.
Ha Meghalaya, ki samla pule kiba la pass ïa ka eksamin Class-XII (Science and Commerce) kin ïakhun ïa ka CUET wat lada ki la dep pass ban kiew sha kawei pat ka kyrdan pule.
Ka jingdon ka CUET ka la nang pynbunkam ïa ki samla kiba la pass namar ki hap thoh eksamin biang na ka bynta ban ïoh pule kham shalor.
Kumba ka long mynta, ki la don lypa saw tylli ki jaka thoh eksamin CUET ha Jylla kiba kynthup ïa ka NEHU Shillong campus, NEHU Tura campus, Rama Krishna Mission Vivekananda Cultural Centre, Shillong bad iON Digital Zone iDZ Qualapatty, Shillong.
Ha ka jingshisha ka Sorkar Jylla ka la pan shuh ïa ki jaka thoh eksamin CUET kiba dei ban don kham bun tylli ha kane ka Jylla na ka bynta ki samla pule Under Graduate (UG).
Ki samla kiba pyndep ïa ka Class-XII ki hap ban thoh ïa ka eksamin CUET bad ki hap pass na ka bynta ban ïoh leit pule ha ki kolej bapher-bapher ha Jylla kiba pynïasoh bad ki skulbah kiba dei jong ka Sorkar kiba don ha Jylla bad ha kiwei ki Jylla.
Ka tnat pule puthi ka Sorkar Jylla kham mynshwa ka la dep phah shithi sha ka NTA ban buh shuh kham bun tylli ki jaka thoh eksamin CUET ha Jylla khamtam na ka bynta ki samla pule ki ban thoh ïa ka eksamin CUET Under Graduate, 2024.
Ka tnat pule puthi ka la buh ka jingtyrwa sha ka NTA ban buh shuh shuh ïa ki jaka thoh eksamin kawei ha Williamnagar, Don Bosco College ha Tura, St. Mary’s College, Shillong, bad ha Kiang Nangbah College, Jowai.
Ha ki snem kiba la leit, ki samla kiba la pass ki ïoh ban leit pule katkum ka jingpass jong ki hynrei mynta kane ka CUET ka la pynbunkam ïa ki samla pule namar lada kito kiba pass bha bad wan shakhmat ruh ki hap ïakhun beit ïa ka eksamin CUET na ka bynta ban ïoh pule kham shalor.
