Shillong, Jymmang 08
Ki shipai BSF ha ka jingkhynra kaba ki la pynlong ha ka Sngi Ba-ar ha ki bynta bapher-bapher ban tehlakam ïa ki kam khaïi tuh, ki la ïoh ban kurup ka shini, ki masi bad ki jingtah pynbhabriew na jaka khappud bad ka Bangladesh.
Ki BSF ka Meghalaya Frontier kiba la peitngor bha ha ki bynta jong ka khappud ban khanglad ïa ki kam khaïi tuh, ki la ïoh ban kurup ïa kitei ki mar kiba shongdor haduh kumba T. 15 lak.
La ong ba kane ka jingleit khynra ka la long hadien ba ïoh ïa ka jingtip kaba thikna, ha kaba ki shipai BSF ka 4 Bn ki la ïoh kurup ïa ki jingtah pynbhabriew na khappud ka East Khasi Hills District. Ïa kine ki tiar la aiti noh sha ka tnat Custom ba kan leh ïa kaba donkam.
Nalor kane, ki BSF ka 193 Bn ki la ïoh kurup ruh haduh 8 tylli ki masi na khappud ka Dulainala kiba thmu ban khaïi tuh sha Bangladesh.
Ym tang katta, na ka liang ki BSF ka 200 Bn ryngkat ka jingïatreilang bad ki pulit hadien ba ki la ïoh jingtip, ki la hiar ban khynra ïa kawei ka ïing ka bym sah briew kaba don hajan ka khappud South Garo Hills bad Bangladesh ha kaba la ïoh ban kurup noh ïa ka shini ba la buhrieh ha kane ka ïing.
