Mumbai, Jymmang:
Ka kynhun Central Bureau of Investigation (CBI) ka la ïakhun tyngeh ha kaba ïadei bad ka kynhun kaba ju khaïi briew da kaba kem ïa saw ngut ki briew kiba la sah pynshisha ba ki la donkti ha ka ban khaïi ïa ki nong India na ka bynta ban leit ïakhun thma ha ka tnat shipai Russian Army.
Ha ka sngi Ba-ar, ka kynhun CBI ka la kem ïa arngut ki briew kiba la shah suba donkti ha kane ka kam ha kaba ïa kine la tip kyrteng kum u Arun bad u Yesudas Junior, kine baroh arngut ki dei ki nongshong shnong jong ka Thiruvananthapuram, Kerala.
Kane ka jingshahkem jong ki ka la long hadien ba la dep ban pynlong ïa ka jingpyntreikam kaba kyrpang halor ka jingwad bniah halor kane ha ka 24 tarik. Ïaïong, ha kaba arngut kiwei pat kiba la shah kynnoh donkti lang ïa kiba la tip kyrteng kum u Nijil Jobi Bensam bad u Anthony Michael Elangovan, ki la shahkem ha kaba ïadei bad ka jingjia.
Kane ka jingkem ïa kine ki briew ka long shi bynta jong ka jingïaid shakhmat jong ka jingtohkit ha kaba ïadei bad ka jingdon jong kiba bun ki kynhun ba ju khaïi briew ha kaba ïa kane la ïoh jingtip ha ka 6 tarik, Lber, 2024.
Ka kynhun jong ki nongkhaïi briew ka la pyntreikam ïa ki kynhun ha baroh kawei ka ri, ha kaba ka la kham phai khmat bha sha ki samla da kaba kular ban pynïohkam ïa ki shabar ri. Da kaba pyndonkam da ki Social Media kum ka YouTube bad ki jingïakren ba markhmat, ne da ki phone, kine ki nongkhaïi briew kiba dei ki nongshong shnong jong kane ka ri ki ju kular ban ai kam ïa ki samla ha Russia. Hynrei haba la kylli bad tohkit bniah halor kane la tip ba kane ka jingthmu ban phah sha katei ka ri ka long ban leit pynïakhun thma ïa ki nong India ha ka por ba don ka thma hapdeng ka Russia-Ukraine ha kaba kane kam dei ka mon jong ki na ka bynta ban leit ïakhun ha madan thma.
Ka kynhun CBI ka la buh da ka jingmudui pyrshah ïa ki kynhun jong ki riewshimet ha kaba ïadei bad ka kam khaïi briew ka Visa Consultancy Firms bad ki nongïarap kiba la donkti ban pynïaid shakhmat ïa kane ka kam beaiñ ban phah ïa ki nong India sha Russia da ki jingshukor jong ki.
