Shillong, Jymmang 08
Ka kynhun ïalehkai (mixed relay) jong ka ri ka bym shym la lah ban ïoh rung sha ka Olympics ha ka World Relays, kan ïoh biang sa kawei pat ka lad ban ïoh rung sha Paris ha ka Asian Relays ka ban long ha Bangkok ha ka 20 tarik mynta u bnai.
Ka kynhun ki nongïalehkai kynthei bad shynrang ka ri 4x400m relay ki la ïoh ban lehkmen hadien ba ki la ïoh rung sha ka Paris Olympic ka ban long ha Naitung hadien ba lah ban ïalehkai bha ha ka World Relay kaba la long ha Bahamas ha ka Sngi U Blei.
Hynrei kaba pynduh mynsiem ka long halor ka kynhun ïalehkai mixed relay, ka bym shym la lah ban pynurlong ha ka World Relays, hynrei ka dangïoh biang sa kawei ka jingïakhun ban ïaknieh rung sha ka Olympic.
“Naduh ba ka kynhun ïalehkai 4x400m jong ki shynrang bad kynthei ki la ïoh rung na ka bynta katei ka lympung ka ban long ha Paris, nga sngew ban long ba sa tang ka kynhun (mixed relay) ka ban ïakhun biang ha Asian,” la ong u M.K. Rajmohan, uba long u deputy chief athletics coach.
“Ki nongjied bad ki coach kin hap ban rai halor kaneka bynta hadien ka Federation Cup ka ban long ha Bhubaneswar kaba la thmu bansdang naduh 12 haduh 15 tarik mynta u bnai.”
Na ka liang u Rajmohan u la kyrmen skhem ba ki nongmareh (mixed relay) kin lah ban pynurlong na ka bynta ka Paris ha Bangkok watla ki hap ban pynpra ïa ka rekod hapoh ka ri (3:14.34 sekhon) kaba ki la khur ha ka Asian Games, China kaba la long ha u Risaw jong u snem 2023.
“Ngi don ïa ki ar ngut ki nongmareh kynthei kiba lah ban pyndep palat ia ïki 51 minit (Jyothika Sri Dandi 51.36 sekhon, Subha Venkatesan 51.65 sekhon ha ka women’s 4x400m ha World Relays). Kumjuh ki rangïalehkai ki long ki long kiba biang ha kaba ki la lah ban pyndep hapoh ki 3:13.50 sekhon,” u la bynrap.
Wat la ki la don haduh 14 tylli ki jaka kiba thylli na ka bynta ka Olympics la lah ban pyndep ha Bahamas, sa tang ar kiba dangthylli ban ioh rung sha Paris ha ka mixed relay bad ka India kan hap ban ïalehkai bha na ka bynta ban tam ïa ka Italy kaba la lah ban pyndep ha ki 3:13.56 sekhon khnang ban ïoh rung sha ka Olympic.
Lah ban kdew ka India ka la lah ban pyndep ha ki 3:20.36 sekhon bad ka la wan ha ka kyrdan ba hynriew ha ka mixed relay heat ha ka wat kaba nyngkong jong kane ka lympung ïaknieh kaba la long myn ha ka 4 tarik mynta u bnai. Te kumta ka India kam shym la lah ban ïalehkai bha ha ka sngi U Blei, hynrei ka dangdon jingkyrmen ban ioh rung na ka bynta katei ka lympung ka ban long ha Paris.
