Shillong, Jymmang:
U Vice Chancellor (VC) ka North Eastern Hill University (NEHU), Prof. Prabha Shankar Shukla ha ka Sngi Ba-ar u la khot ïakren ïa ka NEHU Teachers’ Association (NEHUTA) ban pynbeit ïa ki mat ba sahteng kiba ka seng ka la pynsngew baroh shi katta.
Ha ka jingshisha, ka NEHUTA ka la thmu ban pynlong ïa ka jingïakhih da kaba ïalum lang hakhmat ka Library ha ka por 2 baje noh phai sngi ïa kaba hadien kin tur pat sha ophis treikam u VC kum ka dak ka jingpyrshah.
Kitei ki mat ba sahteng jong ka seng ki kynthup ïa ka jingthung/jingthung biang (ha la ka mon) ïa ki Dean jong ki skul bapher-bapher, ha kawei ka liang kaba pynkheiñ ïa ka aiñ jong ka NEHU bad ka rukom long haba ïadei bad ka jingthung ïa ki Dean da ka pali katkum ka jingrangbah ha ka kam, ki mukotduma CAS ba sahteng na bynta baroh ki kyrdan ba kynthup naduh ka kyrdan ba 5 haduh 6 (Senior Professor) bad ka jingplied ïa ki ‘envelop’ ba ïadei bad ka jingpynbeit ïa ka tarik kiew kyrdan jong ki dkhot.
Hadien ka jingïalang bad u VC, u President ka NEHUTA, Prof. Lakhon Kma haba kren halor ka jingthung biang ïa ka Prof. C. Mawlong kum ka Dean ka School of Social Sciences, u la ong, “Ka Prof. C. Mawlong hashuwa, ka la shah thung kum ka Dean bad hadien ba la kut noh ka samoi treikam jong ka, ka la shah thung kum ka ‘Head’ bad sa shisien ka la shah thung biang kum ka Dean. Kane ka long kaba be-aiñ naba ki don 20 ngut ki Professor kiba la rangbah ha ka kam bad i kumba ym don Professor shuh ha skul. U VC um shym la lah ban pynshai halor ka jingthung biang ïa ka.”
U Prof. Kma u la ong ba ka Executive Committee jong ka NEHUTA kan sa shim ïa ka rai halor kumno ban ïaid shakhmat bad kane ka mat.
U la ong ba ka NEHUTA da lei-lei kan ym shah ïa kane ban urlong naba ban knieh noh na kito kiba dei ban ïoh, namar ka dei ka hok jong ki bad ki kyndon ka skulbah ki ong ba la thung ïa ki Dean ha la ka pali katkum ka jingrangbah ha ka kam.
Halor ki mukotduma CAS, u VC u la pynsngew sha ka seng ba ka skulbah ka la sdang bad ki kyrdan 1 haduh 2 bad 2 haduh 3.
U Prof. Shukla u la ong ruh ha ki nongïalam ka NEHUTA ba un pyndep shuwa ïa ka mat ba ïadei bad ki nongtrei ki bym hikai hapoh u Naitung bad hadien kane, yn sa poi sha ka jingkiew kyrdan jong ki nonghikai.
U Prof. Kma u la ïathuh ba ka kynhun ka la ong ha u VC ba kan sa ïakynduh biang ïa u hadien ka 30 tarik Naitung ban buddien halor katei ka kam.
Shuh shuh haba ïadei bad ka mat halor ka jingplied ïa ki ‘envelop’ ba ïadei bad ka jingpynbeit ïa ka tarik kiew kyrdan jong ki dkhot kaba la sahteng da ki snem, utei u nongïalam u la ong ba ym pat lah ban pynbeit ïa kane ka mat ha ka jingïalang.
U la ban ba ka seng kan sa ïakynduh biang ïa u VC hadien ka 30 tarik Naitung ban lap kaei kaba ka Executive Council jong ka skulbah kan leh halor kane ka bynta.
