Ka sorkar jylla ka dang ap ïa ka bor na ka Election Commission jong ka Ri India (ECI) ba kan ïoh thung ïa u/ka khlieh duh ka tnat pulit lane Director-General of Police (DGP) ha jylla namar ka samoi treikam jong u DGP uba mynta, u LR Bishnoi, kan kut noh ha ka 19 tarik Jymmang, 2024. Shwa ban ïatai halor kane ka mat, ngi shu kwah ban ong lypa ïa kane ba la biang shwa kiba nabar bad ailad noh sa ïa ki trai shnong ban khlieh ïa ka tnat pulit. La kumba katto katne snem mynta, ngi khlem ïoh shuh da ki trai shnong ki ban long ki DGP bad haba ka lad ka don mynta, ka sorkar ka dei ban pyrkhat. Na ka liang ka Union Public Service Commission (UPSC) ka la phah ïa ka kyrteng jong ki lai ngut ki ophisar IPS ha kaba iwei na ki, yn sa thung ha kane ka kyrdan. Ki lai ngut ki ophisar IPS kiba ka UPSC ka la phah ïa ka kyrteng jong ki ban shah thung ha ka kyrdan DGP ki long ka Kong Idashisha Nongrang, kaba la rung sha ka IPS ha u snem 1992, u R P Meena (snem 1993) bad Deepak Kumar (snem 1994). Lada peit na ka jingslem ha ka kam napdeng kine ki lai ngut, dei ka Kong Nongrang kaba wan hakhmat eh.
Ka Kong Nongrang kaba la kham shwa kum ka ophisar IPS ka lah ban shah thung kum ka DGP bathymmai ka jylla bad lada ka shah thung, kan dei ruh ka ophisar IPS kynthei kaba nyngkong eh na kane ka jylla ban poi sha kane ka kyrdan. Ka Kong Nongrang mynta ka dang bat kum ka Director General (Civil Defence & Home Guards). Dang shen, ka sorkar jylla ka la phah ïa ka kyrteng jong ki san ngut ki ophisar IPS sha ka UPSC ban jied ïa ki ban shah thung ha ka kyrdan DGP. Kine ki san ngut ki long ka Kong Nongrang, R P Meena, Deepak Kumar, u G P Singh (snem 1991) bad u Harmeet Singh (snem 1992). Hynrei kine ki ar ngut, kata, u G P Singh, uba dei mynta u DGP ka tnat pulit ha Assam, bad u Harmeet Singh, Special DGP ha Assam, kim treh ban wan shimti lada ki shah thung ha ka kyrdan DGP ha Meghalaya.
Nalorkata, hashwa ban shimti u Bishnoi kum u DGP, ka Kong Nongrang ka la long kum ka Special DGP ka jylla. Kane ka longkmie, ha ki snem kiba mynshwa, ka la long kum ka Commandant ka 1st Meghalaya Police Battalion, Mawïong, Superintendent of Police (SP) ka East Khasi Hills (ha ka por ba dang khlaiñ ki kam kieng atiar bad synjor ka shongsuk shongsaiñ), bad bun snem ha ka tnat syntiat jong ka ri, ka Intelligence Bureau (IB). Namarkata, ka la biang pura ïa kane ka longkmie ban ïalam ïa ka tnat pulit ha ka jylla namar ka tip ruh kham bha ïa ka jinglong jingman ha ka jylla bad ki nongshong shnong haba ïanujor bad kiba wan na shabar. Kan shimpor ïa kiba wan na kiwei pat ki jaka ban sngewthuh ïa ka jylla jong ngi, bad kat ba kin da sngewthuh, ka kam ka la ïaid shano-shano.
Lada ka sorkar ka dang ailad beit ïa kiba nabar ban shimti kum ki DGP, kan long ka khubor ka ban pynduh mynsiem. Ngim ju ïoh man la ka por ïa ki trai shnong ba kin long DGP, bad lada ym ailad ha ka por ba ka jingkhang ka dang plie, sa kaei pat ngin nang ïakren? Tangba ha kajuh ka por, kita ki trai shnong ruh ki dei ban ai ïa ka jingshakri kaba bha tam bad kaba beit na ka bynta ka jingbit jingbiang jong ka jylla. Ka tnat pulit ka donkam bha ïa ka jingpynkylla namar ki pulit ki shah kynnoh laiphew jait laiphew skit ha kiba bun ba lang. Ka dei ka kamram jong kiba khlieh ïa kane ka tnat ban pynkhuid, pynbha bad pynjanai ïa ka jingai jingshakri sha ki paidbah. Lada ki pulit kim ïoh ïa ka jingïatreilang na ki paidbah, kam don jingmyntoi bad yn ym lah ban ïakhun ïa ki kam sniew kam smeh kiba bun. Ka jingduh ïa ka jingshaniah na ki paidbah ka long kum u diengpynkiang uba heh bah na ka bynta ki pulit. Namarkata, ka dei ka kamram jong kiba khlieh ïa ka tnat ba kin pynïoh biang ïa ka jingshaniah.
Ngi kyrmen ba ka sorkar jylla, ha kane ka kynti, kan ailad ïa ka trai shnong ba kan khlieh ïa kane ka tnat bakongsan bha. La donkam ban pynbha pat ïa ka jingtreikam jong kane ka tnat kaba la duh bha ïa ka jingshaniah jong kiba bun ba lang. Ka sorkar ka dei ban ailad ban wanrah ïa ki jingkylla ha kane ka tnat hashwa ka kan nang jot bun spah shah. Ki paidbah kin ym shaniah shuh lada kim ïohi ïa kita ki jingkylla ba kin treikam pura ha ka tnat pulit la ki dei kiba rit eh ne ki bakhraw tam. Lada lah ban pynbeit naduh nalor, kan ym jynjar ban pynbeit ïa kiba don sha trai. Hynrei lada ka jingbakla ka dei naduh na khlieh, kan eh ban wanrah ïa ki jingkylla nadong shadong ha ka tnat pulit. Namarkata, ka shong ha ka jingstad jong ka sorkar jylla bad ha kita ki ban khlieh ïa kane ka tnat kumno kin pynïaid ïa ki kam ki jam nangne shakhmat.
