Shillong, Jymmang 08
Ki skul ha kylleng ka nongbah ki la wan shakhmat ha ka eksamin ba dang shu dep jong ka Meghalaya Board of School Education (MBoSE) bad ïa kane la sakhi lyngba ka risol jong ka Higher Secondary School Leaving Certificate (HSSLC) kaba katei ka tnad treikam ka la pynbna ha ka Sngi Balang.
Ki risol kiba la pynbna ha kane ka sngi ki kynthup ïa ka tnad pule ‘Science’, ‘Commerce’ bad ‘Vocational’.
Ki skul kiba la ïoh bat palat kawei ka kyrdan ha ka thup ‘Top-10’ ha ka tnad pule ‘Science’ bad ‘Commerce’ ki kynthup ïa ka Laban Bengalee Boys’ Hr. Sec. School, Shillong (LBBHSSS), St. Mary’s Higher Secondary School, Shillong, St. Edmund’s Higher Secondary School, Shillong, St. Anthony’s Higher Secondary School, Shillong bad na North Liberty Higher Secondary School, Mookyrdoop, Jowai. Ha ka tnad pule ‘Science’, ïa ka kyrdan ba nyngkong la ïoh da u Sohan Bhattacharjee jong ka LBBHSSS (483 marks) katba ka kyrdan ba-ar ka la leit sha u Gordon Kupar Nongbri na St. Edmund’s Higher Secondary School, Shillong (476 marks). U Ar Meker Marpna na St. Anthony’s Higher Secondary School, Shillong u la wan ha ka kyrdan ba lai bad u la ïoh 471 ‘marks’.
Na ki 3,766 ngut ki khynnah pule kiba ïakhun ha katei ka eksam jong ka tnad pule ‘Science’, 3,210 ngut ki la ‘pass’ bad ka jingdon jong baroh ki khynnah kiba la ‘pass’ ha kane ka eksamin ka long 85.24%. Ka jingdon jong ki khynnah pule kiba ‘pass’ mynta u snem ka la kiew da 6.4% na u snem ba la dep, kaba long 78.84% Na kitei, 1,295 ngut ki la wan ha ka kyrdan ‘First Division’, 1,597 ngut ha ka ‘Second Division’ bad 145 ngut ha ka ‘Third Division’.
Ha kawei ka liang, ha ka tnad pule ‘Commerce’, ka Ferry Filarisha Wann na St. Mary’s Higher Secondary School, Shillong kaba la ïoh 472 ‘marks’ ka la wan ha ka kyrdan banyngkong, katba u Raj Paul na St. Anthony’s Higher Secondary School, Shillong u la ïoh ïa ka kyrdan ba-ar (463 marks). Ïa ka kyrdan ba-lai la ïasam hapdeng u Pongkoch Dutta na Laban Bengalee Boys’ Hr. Sec. School Shillong (458), ka Pinky Kumari na St. Anthony’s Higher Secondary School, Shillong (458 marks) bad u Aditya Prasad na Don Bosco College (Hr. Sec. Section), Tura (458 marks).
Ka jingdon jong ki khynnah pule kiba ‘pass’ ha ka tnad pule ‘Commerce’ ka long 80.26%. Kumjuh, na ki 2,411 ngut kiba la ïakhun ha kane ka eksam mynta u snem, 1,935 ngut ki la ‘pass’. Ka jingdon jong ki khynnah pule kiba ‘pass’ ha u snem ba la dep, kaba long 79.31%. Shuh shuh na kitei, 680 ngut ki la wan ha ka kyrdan ‘First Division’, 956 ngut ha ka ‘Second Division’ bad 179 ngut ha ka the ‘Third Division’.
Haba phai pat sha ka ‘Vocational’, na ki 11 ngut ki khynnah pule kiba ïakhun ha kane ka eksam, baroh 11 ngut ki la ‘pass’ bad ka jingdon jong baroh kiba ‘pass’ ka long 100 na ka 100.
