New York, Jymmang:
Katkum ki khubor, la ong ba ki paid nongïakhih hapoh ka nongbah New York ki la leit ban tur sha ka jaka ba don ka tamasa ‘Met Gala’ kaba la ïadon bynta da ki khlur ba pawnam jong katei ka ri ha ka Metropolitan Museum of Art. Nangta, la ong ba kitei ki paidbah ki la leit ban ker sawdong ia katei ka jaka, ha kaba da ki hajar ngut ki nongïakhih halor ka thma Israel ki la mih sha khmat ban pyrshah jur ha kine ki sngi.
Kumta la ong ba ha Central Park, la iohi ia shibun ki paidbah nongïakhih kiba rah ruh ia ki jingthoh ‘cardboard’ kaba ong ‘No Met Gala While Bombs Drop in Gaza’ bad ‘No Celebration Without Liberation’, kaba mut ba ym bit ban pynlong ia kum kitei ki tamasa sngewbha katba ka Gaza ka dang shah thombor khlem sangeh ha ka Israel. Nalor kata ruh ki la pyrshah jur ia ka jing-leh kmen- leh sngewbha ha katei ka jaka naba ki ong ba ki paidbah nong Palestine hapoh Gaza pat ki dang im syrtok bad ki im hapdeng ki jingma jong ka thma namar ba ka Israel kam shym la sangeh tdot ia ka thma.
La ong ba katei ka jingjia ka long ruh hadien ba kiba bun ki jaka pule ha kylleng ka ri United States ki la sakhi ia ki jingiakhih paidbah haba iadei bad ka jingleit hiar thma jong ka Israel sha Gaza, ha kaba kiba bun hi ki paidbah bad ki jaitbynriew bapher bapher ki la ai jingkyrshan ia ki nong Palestine hapoh Gaza bad ki la dawa ia ka Israel ba ka dei ban sangeh noh shi syndon ia katei ka thma. Hynrei ka jingiakhih paidbah jong ki hapoh United States pat ka long ban kyntu ia ka US ba ka dei ban pynbor ia ka Israel ban sangeh noh shi syndon ia ka thma namar kumba la iohi naduh ba sdang jong ka thma ruh dei ka United States hi kaba la ai mynsiem bad pynshlur ia ka Israel ban leit kput ia ki lehnoh Hamas kiba synshar hi ia ka nongbah Gaza mynta da ki phew snem.
