Washington, Jymmang:
U President ka Untied States- u Joe Biden ha ka Sngi Nyngkong u la maham tyngeh ia u Myntri Rangbahduh ka Israel- u Benjamin Netanyahu halor ka jingthmu jong ka Israel ban leit thombor bad pynum ia ka nongbah Rafah jong ka Gaza wat hadien ba ka Israel ka la pynkynriah noh shuwa ia ki paidbah nongshong shnong na katei ka bynta jong ka nongbah Gaza.
Namar la ong ba ka United States ka la ai jingkyrshan ia ka rai jong ki lehnoh Hamas ban sangeh noh ia ka thma, hynrei ka Israel pat kam shym pynsngap ne patiaw ia katei ka jingkyntu jong ki tnat ba bun ba ka dei ban sangeh noh ia ka jingleit hiar thma sha Gaza namar ka jingeh jong ki paidbah nongshong shnong kiba la shah ktah jur ha ka jingleit hiar thma ba khlem sangeh jongka.
U Biden u la ong ba ka US ka dang peit shakhmat ia ka rai jong ka Hamas ban sangeh noh ia ka thma pyrshah ia ka Israel lada ka Israel ka pdiang ia katei kajuh ka rai. Hynrei kumba la iohi hi, ka Israel kam shym pdiang ia ka jingiakren iasuk bad ka Hamas.
