Shillong, Jymmang 08
Wat lada ka Sorkar Jylla kam pat shim ïa ka rai kaba khatduh ban khang noh ïa ka karkhana pynmih dewbilat ka Mawmluh Cherra Cement Limited (MCCL), hynrei ki dieng pyngkiang ki la mih kiba lah ban lam sha ka lynti ban khang noh ïa kane ka karkhana kaba la pawnam bha mynshwa ha ka jinglah ban pynmih dewbilat.
Ka tyllong khubor ka ïathuh ba ha ka por ba ka Sorkar Jylla ka la pynmih ïa ka Expression Of Interest (EOI) ban khot ïa ki kompani kiba kloi ban pynïaid biang ïa ka MCCL da kaba shu donbynta lang (joint venture) bad ka Sorkar, ki jingeh ki la mih kiba long kum ki diengpyngkiang ban ïaid ka kam shakhmat. Ki jingeh ki kynthup naduh ka jingshim wai jaka namar ka por wai ka la kut, ka jingpynthymmai ïa ka jingshim wai mar poh khyndew bad kaba kham pynwit eh ka dei ka jingdon ka krem pubon hajan jong ka karkhana namar ym lah ban leh kano-kano kaba lah ban pynjulor ïa ka mariang khamtam ïa kane ka krem.
La ong wat ki kompani kiba wan ïashimbynta ha ka EOI, ki la don jingartatien hadien ba ki la shimbynta namar ki la don kitei ki jingeh.
Ha ka jingshisha ka Sorkar Jylla ka la thmu ban pyntreikam da kaba shu donbynta lang (joint venture) na ka bynta ban pynkhie im biang ïa ka MCCL.
Hynrei kane ka EOI kam shym la seisoh namarba ki kompani kiba ïashimbynta ruh ki khlem ïaid shuh shakhmat bad kane ka la nang buh jingeh ïa ka Sorkar.
Ka Sorkar mynta kan sa ïakynduh ïa ki nongdonbynta (stakeholders) kynthup ïa ki nongtrei ka MCCL ban ïaphylliew jingmut lang ha shwa ban shim ïa kano-kano ka rai. La ong ba kan don ka jingïakynduh bad u Myntri Rangbah bad ki nongdonbynta nalor u Myntri ka tnat Karkhana u Bah Sniawbhalang Dhar, Hima Sohra bad kiwei kiwei. Kan don ruh ka jingïakren halor ka skhim shongthait mon sngewbha lane Voluntary Retirement Scheme (VRS) na ka bynta ki nongtrei ka MCCL bad kiwei kiwei ki mat.
