Shillong, Jymmang 08
Ha ka step phyrngab jong ka Sngi Balang, ki pulit ka Lumshnong ha East Jaiñtia Hills ki la ïoh ban kurup ïa u drok uba shongdor haduh T.3.6 klur bad la ïoh ruh ban kem noh ïa 3 ngut ki nongkhaïi drok.
Kane ka jingïoh kurup drok jong ki pulit ka Lumshong Outpost ka la long ha ka por ba ki la pynlong ïa ka jingtalasi kali ïa ki bos Night Super, ha kaba ki la ïoh ban bat noh ïa 3 ngut ki briew kiba shong ha ar tylli ki bos kaba la mih na Silchar, Assam ban leit sha Guwahati.
Hadien ba la kem bad talasi ïa kine ki briew, ki pulit ki la ïoh kurup ïa u drok ‘Heroin’ ba la thep bha ha 40 tylli ki synduk sabon ba shongdor T.3.6 klur nalor u ganja ba khia haduh 9.031 kilo bad saw tylli ki mobile phone.
Kine ki briew kiba la shah kem ki dei kiba la tip kyrteng kum u Amzad Hussain Lasker na ka shnong Rajnagar, Cachar, u Monib Hussain Basker na Bangram, Cachar bad u Chamir Hussain Barbhuiya na Silchar, Cachar.
Ïa kine baroh 3 ngut hadien ba la dep ban kem la pynrung mukotduma hapoh ka NDPS Act bad ka jingtohkit mynta ka la ïaid shakhmat ban lap dien sa ïa kiwei kiba donkti.
Ha kawei pat ka liang, ki pulit ki la pyntip ruh ba lyngba ka jingtrei shitom ban ïakhun pyrshah ïa ka jingjyllei jong u drok hapoh ka jylla, kata tang ha kine ki 10 sngi ba la leit, ki la ïoh ban kurup haduh san sien.
Ki la pyntip ruh ba ka jingïoh kurup ïa u drok bad kiwei ki jingdih pynbuaid ha kine ki 10 sngi da ki pulit ka East Jaiñtia Hills ka la kot shaduh ka T.15 klur.
