Shillong, Jymmang:
Ka Khasi Students’ Union (KSU) bad ka Jaiñtia Students’ Union (JSU) ki la dawa na ka Sorkar Jylla ba dei ban pynlong biang ïa ka eksamin NEET na ka bynta ka Jowai Centre hadien ba ki samla ba thoh ïa kane ka eksam ki la kynnoh ba ka la don ka jingbakla ai ïa ki jingkylli ha ka por thoh eksamin ha ka Sngi U Blei.
Kane ka jingdawa jong ka KSU West Jaiñtia Hills Unit bad JSU ka la long ha ka jingthoh kaba la ai sha u Myntri ka tnat Pule Puthi ka jylla u Rakkam A Sangma ha ka Sngi Ba-ar bad kyntu ba dei ban pynlong biang sa shisien ïa ka eksamin NEET da kaba pyrkhat ïa ka hok bad ka bha ka miat ki samla ba ïakhun ïa ka.
Kitei ki ar seng ki la kynnoh ba ki la ïohi ïa shibun ki jingleh bakla ha ka sngi ba pynlong ïa ka eksam NEET ha Jowai, West Jaiñtia Hills District.
Ha ka jingthoh ba la phah sha u Myntri, ki ar seng ki la ong, “Haba ngi ïaroh ïa ka jingshimkhia jong ka Sorkar ban pynlong ïa ka eksam ha ka sien ba nyngkong eh ha rilum Jaiñtia, ngi sngewkhia jur ïa ka jingleh bakla kaba la ktah ïa kumba 400 ngut ki samla pule, kiba ïakhun ïa ka eksam. Ngi la ïoh ïa ki jingtip ba ha ka por thoh eksam, ki samla ki la ïoh ïa ar bynta ki jingkylli ba la thoh MNOP bad QRST. Kane ka la pynbakla ïa ki nongïaleh eksam bad wat ki nongpynïaid eksam ki la sah ha ka umdum ba ïa kano ka bynta ba dei ban thoh.”
Shuh shuh ha kane ka jingthoh la ong ba hadien, la pynshai ba dei ka bynta na ka QRST kaba dei ban jubab, kaba la ktah jur ïa ki samla kiba la pynlut ïa ka por ban thoh nyngkong shuwa ïa ka MNOP. Nalorkata, wat la ka la don ka jingpyrshang jong katto-katne ki nongïaleh eksam ban pan jingshai na ki nongpynïaid eksam, hynrei kim shym la ïoh jingshai satia. Nalor kane, ym shym la shah ruh ïa ki samla pule ba kin aiti ïa ki admit card tad haduh ka por janmiet ha kaba bun ki samla kiba dei na ki jaka ba jngai, kim shym la ïoh shuh ban aiti ïa ki admit card haduh mynta.
Kumta ka KSU bad JSU ki la ong ruh ba bun ki samla pule kiba ïakhun ïa ka eksam NEET ki la pynlut por bha ïa lade ha ki jingpule, ki la trei shitom bad pynlut ruh ïa ka pisa tyngka ban pynkhreh ïa ka eksam da ka thong ba kin ïoh rung klas ha ki jaka pule Medical ban leit pule MBBS.
“Namarkata, khnang ban don ka jingleh hok bad ban ailad kumjuh ïa baroh ki samla pule, la donkam ban pynlong biang sa shisien ïa ka eksam ha ka ban pynbeit pat ïa ki jingleh bakla,” la dawa ki ar seng bad pynpaw ba ka long kaba donkam ban leh eiei ruh ha kaban tehlakam ïa kum kine ki jingjia ba dang ïai jia biang.
