Shillong, Jymmang 08
Ka jingangnud u Kylian Mbappe ban ai khublei khatduh ïa ka Paris Saint-Germain na ka bynta ban kynjoh ïa ka nam lahduh kaba nyngkong ha ka Champions League ka la poi sha kaba kut hadien ba shah rem biang ha ka semi final ha ka Borussia Dortmund da 1-0 kol ha ka step jong ka sngi Balang na ka bynta ban tam da 2-0 ha ka aggregate.
Utei u khlur ïalehkai uba la lah ban ban pynurlong ïa ka France ban rah nam lahduh ha ka World Cup 2018, u la pynkhreh ban mih noh na ka PSG namar ka kontrak ka jong u kan poi sha kaba kut ha kaba kut jong kane ka aïom.
Wat la u la don jingthmu ban leit ïasoh noh sha ka Real Madrid, hynrei ka jingangnud ka jong u hi ka long ban pynurlong ïa katei ka klob na France ba kan rah ïa ka nam lahduh ka ban long ha Wembley ha u bnai ban wan.
Wat la ka PSG kaba la shah rem ha ka wat nyng-kong da 1-0 kol, ka la pyrshang ban ïakhun tyngeh ha kaba ka la ïoh ban shut haduh 31 sien, hynrei kam shym la lah ban pynurlong. Hynrei u Mats Hummels u la ïoh ban pynkhih jar ha ka minit kaba 50 na ka bynta ban pynlong ïa ka Dortmund ban kynjoh sha ka thong.
U Mbappe, uba long uwei napdeng ki saw ngut ki rangïalehkai ka PSG kiba la ïalehkai bha ha ka kylla miet, u la kubur ba kum ka kynhun ki donkam ban ïalehkai bha bad kumjuh ban pynurlong ïa ki kabu ksiar.
“Ngam ju kwah ban kren eiei shaphang ka nusib kaba sniew. Haba ngi ïalehkai bha, hynrei ngim shym la lah ba thep kol. Nga pyrshang katba lah ban leh eiei namar nga dei uwei napdeng ki rangïalehkai u ban thep kol,” la pynpaw u Mbappe hadien ka jingshah rem ka kynhun jong u.
Kumba ka paw u Mbappe u la long u rangthep kol ba kynsai ha kaba u la lah ban thep haduh 255 kol, kynthup ia 42 kol ha ka Champions League.
Lyngba kane ka jingjop ka la pynlong ïa ka Dortmund ba kan ap sa kawei pat ka kynhun na ka bynta ban ïaknieh ïa ka nam lahduh ka ban long ha ka 2 tarik u Jylliew.
