Shillong, Jymmang 08
U President ka Hynñiewtrep Youths’ Council (HYC), Bah Roykupar Synrem, u la byrngem ba lada ka sorkar kam lah ban kyndang ïa ki briew kiba sah be-aiñ kiba don palat 80 tylli ki ïing eiei ha Lum Survey ka seng kan sa ïalam ïa ki paidbah jong ka Bri U Hynñiewtrep.
Ïa kine ki kyntien u la pynpaw haba ïakren bad ki nongthoh khubor hadien ba la dep jurip ïa ka jaka sah ki poiwir ha Lum Survey ha ka Sngi Balang ha jingïadonlang u Additional Deputy Commissioner ka East Khasi Hills u AG Momin, u CEO ka Municipal u P.K Boro bad ki bor Cantonment ha ka jingsynranlang ki pulit.
U la ïathuh hadien ba ki ophisar jong ka sorkar jylla ki la sakhi dalade bad lum kyrteng jong ki briew bad ki ïing, ka Defence Estate Officer ka dei ban pynsted ban kyndang ïa kitei kiba sah be-aiñ lym kumta ka seng kan nym bahkhlieh lada jia eiei lada wan ïalam da ki paidbah namar kam kwah ba kane ka jaka kan long kum ka jaka sah ha Them Metor.
Nalor nangta, u la ïathuh ba na ka 80 ïing, ki don kumba 40 ïing eiei kiba khang tala ha ka por ba leit jurip, hynrei ka seng ka shim ba kine ki briew kim pat phet na kine ki ïing namar ki dang leit bylla ha ka por mynsngi.
U la pyntip ba ki briew kiba sah be-aiñ ha kane ka jaka ki dei kiba wan na Assam bad Uttar Pradesh.
Ha kawei ka liang, ki nongïalam ka HYC bad ki ophisar sorkar ki la lyngngoh hi ngaiñ namar ki briew kiba sah ha ha Lum Survey kaba don ha lyndet ka Ïew Mawlong, ki hap leit paiñkhana shaduh Khyndai Lad kaba ka jingjngai ka long shiteng kilometre namar ha ka jingjurip ym shym la lap wat tang kawei ka paiñkhana wat la ki sah da ki spah ngut.
Ha kane ka jingjurip la ïohi ba ka nala kaba don ha syndah ki ïing ba sah da kine poiwir ka long kaba jaboh bad isaitmet ban peit namar ka shu sahkut hajuh. Kane ka nala kaba la kylla kum ka wahduid ka tuid sha ki thaiñ Umsohsun sha Wahingdoh ban poi sha Wahumkhrah.
Na ka liang ki nongïalam ka HYC ki lyngngoh bad kim lah ban ngeit ba kumno kin leit paiñkhana shaduh Khyndailad kaba jngai ka lynti khamtam ha ka por mynmiet, ka por slap bad ka por shitom.
Ha kane ka jingjurip, ki ïing ki bym khang tala ki don satang ki riewkynthei ki ban jubab ïa ki nongïalam ka HYC bad ki ophisar sorkar bad tang lai tylli ki ïing kiba don shynrang briew.
Uwei u rangbah na Mangaldoi district ka jylla Assam, u la mih na ïing sah ban ïaid dkoh bad shan da u diengduh ban jubab haba ki nongïalam HYC bad ki ophisar sorkar ki leit ban lum kyrteng briew bad ïing kiba don ha katei ka jaka.
Une u rangbah u la ïathuh ba u sah san ngut bad u dei na Mangaldoi district na jylla Assam.
