New Delhi, Jymmang:
Na ka jingithuh ba ka seng Bharatiya Janata Party (BJP) kan sa ïohrah ïa ka jingjop ha baroh 7 tyli ki Lok Sabha konstitwensi ha Delhi, u National General Secretary jong ka seng u Arun Singh ha ka Lah Sngi U Blei u la pyllait ïa ka thup kyrteng jong ki 40 ngut ki nongïalap ilekshon ba pawkhmat, kiba kynthup ïa u heh nongïalam barim jong ka seng Congress ha Delhi u Arvinder Singh Lovely ïa uba dang shen u la leit ban pynïasoh bad ka seng BJP ha ka taïew ba la lah.
U Lovely u la iehnohkam kum u heh nongïalam jong ka seng Congress ha Delhi ha ka sngi Saitjaiñ ha kaba u la pynpaw ba ka daw halor kane ka dei ka jingïatreilang ka seng Aam Aadmi Party (AAP) bad ka seng Congress. Nalor u Myntri Rangbahduh u Narendra Modi, u heh nongïalam jong ka seng BJP u JP Nadda, u Myntri ka tnat ïada ri u Rajnath Singh, u Myntri ka tnat ki kam pohïing u Amit Shah, ki Myntri sorkar kiba kynthup ïa u Nitin Gadkari, Piyush Goyal, Hardeep Singh Puri, Smriti Irani bad u Myntri Rangbah jong ka Uttar Pradesh u Yogi Adityanath ruh kin sa ai jingkyrshan ha ka jingïalang paidbah na ka bynta ban ai jingkyrshan ïa ki 7 ngut ki kyrtong jong ka seng BJP ha Delhi.
Ha kaba ïadei bad kane, ka seng kam pat pyntikna na ka bynta ki tarik ba kine ki nongïalam kin leit ban ïalap ilekshon. Baroh kine ki 7 tylli ki konstitwensi ha Delhi kin sa pynlong ïa ka jingthep vote ha ka 25 tarik, Jymmang.
Ka thup kyrteng jong ki nongïalap ilekshon ka kynthup ïa ki kyrteng jong ki MP jong ka seng BJP ha Delhi kiba la shah pynhap noh na ka suki ha kane ka por kiba kynthup ïa u MP ka Chandni Chowk u Harsh Vardhan (ha kaba la bujli da u nongïalam ka kynhun ki nongkhaïi u Praveen Khandelwal), ka MP jong ka New Delhi ka Meekanskhi Lekhi (ha kaba la bujli da ka khun jong ka Sushma Swaraj ka Bansuri Swaraj), u MP ka West Delhi u Pravesh Verma (ha kaba la bujli da u Mayor barim u Kamaljeet Sehrawat), u MP ka South Delhi u Ramesh Bidhuri (ha kaba la bujli ha ka jaka jong u nongïalam jong ka liang pyrshah ha Delhi Assembly u Ramvir Singh Bidhuri), u MP ka East Delhi u Gautam Gambhir (ba la bujli da u Mayor barim jong ka East Delhi u Harsh Malhotra).
Shi taïew hadien ba u la iehnoh kam na ka seng Congress u Lovely u la leit ban pynïasoh biang bad ka seng BJP, ha ryngkat saw ngut ki nongïalam jong ka seng Congress kiba kynthup ïa u Myntri barim jong ka Delhi u Raj Kumar Chauhan, ki MLA barim kiba kynthup ïa u Naseeb Singh bad u Neeraj Basyoa, bad kumjuh u nongïalam ka seng u Amit Malik ha ka sngi Saitjaiñ.
