Johannesburg, Jymmang:
Ki bor pyniaid ka South Africa ha ka Sngi Ba-ar ki la iathuh ba 48 ngut ki briew ki la sahkut bad shah tap ha ka ïing mala kaba dang pyntrei hynrei kaba la twa noh hapoh ka nongbah George ha ka Lah Sngi U Blei.
Ki don kumba 70 ngut ki briew hapoh katei ka jaka ha ka por ba katei ka ïing mala ka la khyllem ha kaba 22 ngut ki dei kiba la ioh ban pynkit noh sha ka jaka sumar kaba don hajan.
Ki heh na katei ka nongbah ki la pyntip ba ki la phah ia ki briew jong ka tnat iarap ban leit khyllie bad pynkhuid ia kitei ki kynrum-kynram kiba la twa bad tap ia katei ka jaka baroh kawei bad ban pyllait im ruh ia baroh kitei kiba sahkut napoh katei ka jaka.
Wat la katta, ym pat lah ban pyntikna ia ka daw jong ka jingkhyllem katei ka ïing mala kaba don ia ka jaka set kali sha ki bynta khrum ba shapoh jong ka.
Katkum ki dur ba la saphriang paidbah, la iohi ia katei ka jaka kaba la julor bad kylla dpei na ka jingtwa noh jong katei ka ïing mala ha katei ka sngi.
Napdeng kitei ki 22 ngut kiba la ioh ban sei shabar, la don katto katne ngut kiba la ithuh ba ki la mynsaw jur bad kiba don hapdeng ka jingma hynrei ym shym la ioh jingtip pat ban don kiba khlad na katei ka jingjia tad haduh ba la pyllait ia kane ka khubor ha ka Sngi Ba-ar.
Kumta, ki bor pyniaid ki dang phah ia ki briew ka tnat iarap ba kin wad bad sei ia kitei kiba sahkut bad shah tap ha katei ka jaka baroh, khnang ba yn ioh ban sumar bad pyllait im noh ia ki ha ka por kaba biang.
