Shillong, Jymmang 08
Ka lahduh mynshem aïom, ka Mawlai Sports Club ka la long sa kawei pat ka kynhun ka ban rung sha ka final jong ka lympung Shillong Premier League 2023, hadien ba ka pynliem ïa ka Langsning FC da 2-1 kol ha ka Sngi Balang.
Kane ka la wan lyngba u Robert M. Khongriah bad u Kevin Rymbai, katba u Chanmitre Thma u la lah ban pynphai kylla shi kol na ka bynta ka Langsning.
Kumta da kane ka jingjop ka Mawlai kan pynkhreh ban bat biang ïa ka nam lahduh ha ka jingïakhun final ka ban long ha ka Sngi Saitjaiñ pyrshah ïa ka Rangdajied United, kaba la lah ban pynliem ïa ka Shillong Lajong FC da 1-0 kol.
Kumba ka paw ha ka ’round robin stage’, ka Mawlai ka la lah ban jop ïa ka Langsning da 1-0 kol. Katba ka Langsning ha kaba sdang jong kane ka aïom ïalehkai kam shym la lah ban ïalehkai bha, hynrei hadien ka la lah ban wanphai da ka jingjop ha ki san sien ïakhun.
Haba phai sha kane ka jingïakhun semi final kaba ar, baroh ar ki kynhun ki la pyrshang ban ïakhun tyngeh naduh kaba sdang. Wat la kine ki kynhun ki la ïoh ïa ki kabu kiba biang, hynrei kim shym la lah ban thep. Ka Langsning ka la ïoh ïa ka kabu kaba biang lyngba u Nelson Rymbai ha ka minit kaba 30, hynrei um shym la lah ban pynurlong na ka daw ka jingïashan tyngeh u rangapkol ka Mawlai u Siwel Rymbai.
Kumjuh u Sheen Stevenson Sohktung u la ïoh ïa ka kabu kaba biang na ka bynta ka Langsning bad u Damanbhalang Chyne u la shah khanglad ha u rangïalehkai ‘dien ka liang pyrshah.
Dei ha ka kylla miet ba ka Mawlai hapoh ka jingïalam u Bah Hering Shangpliang, ka la ïoh ban pynkhih jar nyngkong eh lyngba u Robert ha ka minit kaba 50 ha kaba u rangapkol ka Langsning u Surjay Kumar Pariyar um shym la lah ban khanglad na ka jingshah thep. Hadien san minit ka Langsning ka la lah ban pynphai kylla lyngba u Chanmitre na ka bynta ban ïakhaid mar shi kol.
Kane ka jingïakhaid ka la pynlong ia kine ki kynhun ban ïai bteng ha ka ban ïakhun tyngeh shuh shuh, hynrei ka Mawlai ka la ïoh ban thep biang ïa ka kol kaba ar lyngba u Kevin ha ka minit kaba 68.
Kane ka shi kol la la pynlong ïa ka Langsning ban ïakhun tyngeh na ka bynta ban pynphai, hynrei da ka jingïakhun tyngeh u Siwel la lah ban khanglad na ka jingshah thep ha u kapten ka Langsning u Ambilstar Sun. Haduh kaba kut ka jingïalehkai ka Langsning kam shym la lah ban pynurlong bad ha kaba kut ka la mad ïa ka jingshah rem.
