Agartala, Jymmang:
Ka sorkar Tripura ka la ai ka jingkyrshan ha kaba ïadei bad ka jingthmu ban pynrben biang ïa ki khlaw ki btap ha ka jylla.
Ïa kane ka jingthmu la pyntip da u Myntri ba dei khmih halor ki khlaw ha Tripura u Animesh Deb Barma.
U Myntri u la pyntip ba ki la don kumba 5 lak tylli ki tynrai dieng ïa kiba yn sa thung tang ha ka shi sngi ha ka jylla kum shi bynta jong kane ka jingthmu.
Kumba ka long mynta, la ong ba ka jingrben jong ki khlaw ha Tripura ka la long da 66 percent.
Ha kaba ïadei bad kane hapdeng ka jingnang jur jong ka jingshit ha ka jylla, ka tnat ba dei khmih halor ki khlaw ha ka jylla ka la ai jingmut ba la dei ban thung noh kham buh ki dieng khnang ban lah ban pynbiang ïa ka jingshit bad ka jingkhluit.
“Ka tnat khlaw ka la rai ban thung ïa 5 lak tylli ki tynrai dieng khnang ban lah ban pynrben biang ïa ka khlaw ha ka jylla,” la ong u Barma ha ka jingïakren bad ki nongthoh khubor.
Ka jingthmu na ka bynta ban thung ïa kine ki dieng kumba la buh kan sa long ha ka taïew banyngkong jong u Naitung, wat lada ym pat lah ban pyntikna ïa ka tarik na ka bynta ban pynurlong ïa kane ka jingthmu.
