Jowai, Jymmang 08
Ka North Liberty Higher Secondary School, (NLHSS), Mookyrdup ha Jaiñtia Hills ka la tyngshaiñ bad paw hadien ba ka la lah ban wanrah nam ka burom ïa ka rilum Jaiñtia da ka jingïoh rung sha ka kyrdan Top-10 ha ka risol Higher Secondary School Leaving Certificate Examination (HSSLC) kaba la pynbna da ka Meghalaya Board of School Education (MBoSE) ha ka 8 tarik Jymmang.
Kane ka nam ka burom ka la wan hadien ka jinglah ban sei ïa ar ngut ki khynnah skul kiba kynthup ïa u Weibha Nongtdu Lakiang bad Joshaviah Onan Paswet, kiba wan ha ka kyrdan 6 bad 7 ha ka Science Stream.
U Weibha u la ïoh ka marks ba 466 bad ïoh heh mark ha ka Mathematic bad u Joshaviah u la ïoh 460 marks ryngkat ka heh mark ha ka sobjek English bad Mathematic.
U Weibha Nongtdu Lakiang u dei u khun jong ka Kong Maria D Lakiang bad Bah Demetrius Nongtdu na ka shnong Mihmyntdu. Lah ban pynkynmaw ba u Weibha Nongtdu Lakiang ha ka eksamin SSLC u la wan ha ka kyrdan 4 ha ka thup kyrteng Top-20.
U Joshaviah Onan Paswet u dei u khun jong ka Kong Diamond Paswet bad Bah Augustine Langstang na Ladthadlaboh, Jowai.
Haba ïoh ban ïakren bad kine ar ngut ki khynnah ki la pynpaw ka jingsngewnguh ïa U Blei, ki bahaïing hasem, u Principal ka skul khamtam ïa ki nonghikai bad kmie ki kpa kiba ju pynshlur ïa ki na ka por sha ka por.
Kine ar ngut ki don ïa kajuh ka thong ban leit pule doktor. Ki la kyntu ïa kiwei ki khynnah ba kin ym duh jingkyrmen ha ki jingpule hynrei ban trei shitom namar tang ka jingtrei shitom kaba lah ban pynpaw pyrthei ïa ka sap ka phong ba la ai U Blei.
U Principal ka skul North Liberty Higher Secondary School u Bah B Richard Uriah u la pynpaw ka jingsngewkmen bad ai khublei kyrpang ïa kine ar ngut ki khynnah kiba la wanrah nam rah burom ym tang ïa ka skul hynrei ïa ki kmie ki kpa kumjuh ka District West Jaintia hi baroh kawei.
U la kitbok-kitrwiang ruh ïa ki ba U Blei un kyrkhu kyrpang ba kin nang ïoh ka lad ban pule katkum ka jingthmu bad jingangnud ka jong ki.
U la ïathuh ba ki khynnah kiba ïakhun ïa ka eksam HSSLC (Science) ki don 35 ngut bad baroh ki pass lut. Kiba wan ha ka kyrdan 1st Division ki don 29 ngut, ha ka kyrdan 2nd Division ki don 6 ngut. Kiba ïoh Distinction ha ka sobjek English ki long 17 ngut, Mathematics 10 ngut, Khasi (IL) 11 ngut, Physics 5 ngut, Chemistry 6 ngut bad Biology 5 ngut.
