Mumbai, Jymmang:
Ka seng Congress ka ban sa ïakhun tang ha ki 6 tylli ki konstitwensi na ki 24 tylli kiba dang sah ha ki ar tylli ki bynta jong ka ilekshon ha Maharashtra, u nongïalam jong ka seng u Rahul Gandhi un sa don bynta ha ka jingïalap ilekshon ha ka jylla.
Ha ka jaka kane, u President jong ka seng u Mallikarjun Kharge bad ka heh nongïalam jong ka seng ka Priyanka Gandhi kine sa ai jingkren ha ki jingïalang paidbah.
Ha ka bynta kaba saw jong ka ilekshon ka ban long ha ka 13 tarik, Jymmang, ka seng Congress kan sa ïakhun na Pune, Jalna bad Nandurbar Lok Sabha konstitwensi.
U Rahul Gandhi u la dep lypa ban pynlong ïa ka jingïalang paidbah ha Pune katba ka Priyanka Gandhi kan sa pynlong ïa ka jingïalap paidbah ha Nandurbar ha ka 10 tarik, Jymmang.
Ha ka bynta kaba san, ka seng kan sa ïakun ha Dhule kaba don ha ka bynta ba shaphang Shatei jong ka Maharashtra bad ar tylli ki konstitwensi ha Mumbai.
Na ka bynta ka jingïalap ilekshon hangne, u heh nongïalam jong ka seng u Mallikarjun Kharge un sa pynlong ïa ka jingïalap ilekshon ha ka 15 tarik, Jymmang.
“U Rahul Gandhi un sa ïakhun na Rae Bareli Lok Sabha konstitwensi ha Uttar Pradesh ha kaba ïa ka ilekshon yn sa pynlong ha ka 20 tarik, Jymmang. Un sa pynlong ïa ka jingïalap ilekshon ha kane ka konstitwensi bad ha kiwei pat ki bynta jong ka ri. Ngi la jied ïa ki nongïalam ki ban don bynta ha ka jingïalap ilekshon hangne, kynthup ïa u Kharge bad ka Priyanka,” la ong u heh nongïalam jong ka seng Congress.
