Shillong, Jymmang 08
U khlur nongkawang sum jong ka ri uba la khur ïa ka takma ksiar ha ka Olympic bad ruh uba la bat ïa ka nam lahduh ha ka pyrthei, u Neeraj Chopra un wanphai sha la ïing ha ka sien kaba nyngkong eh ha ki lai snem hadien ba u la pynthikna ïa ka jingthmu ban wan ïashim bynta ha ka National Federation Cup ka ban long ha Bhubaneswar ka ban sdang naduh 12 haduh 15 tarik mynta u bnai Jymmang.
Une u khlur ïalehkai uba dang 26 snem ka rta u la khmih lynti ban wanphai sha India na Doha na ka bynta ban pynkhreh ïa katei ka lympung bah jong ka Diamond League ha ka 10 tarik mynta u bnai.
“Kat kum ka jingpynthikna, u Neeraj Chopra bad u Kishore Kumar Jena kin wan ban ïashim bynta ha kane ka lympung ïalehkai jong ka ri ka ban sdang ha ka 12 tarik mynta u bnai ha Bhubanesh-war,” la pynpaw kat kum ka kyrwoh jong ka Athletics Federation of India.
Na ka liang u coach jong u Chopra u Klaus Bartonietz ruh u la pynthikna ïa ka jingthmu ban wan ïashim bynta ha katei ka lympung ka ban long ha Bhubaneswar.
U Kishore Jena uba la 28 snem ka rta, uba la khur ïa ka takma rupa ha ka Hangzhou Asian Games bad u Chopra ha ka takma ksiar, kin ïashim bynta ha ka Doha Diamond League ha ka 10 tarik mynta u bnai.
U Chopra u la ïalehkai khatduh eh hapoh ri India ha kane kajuh ka lympung ha ka 17 tarik u Lber 2021, ha kaba u la khur ïa ka takma ksiar hadien ba u la lah ban kawang haduh 87.80m.
Naduh katei ka por u Chopra uba la lah ban khur ïa ka takma ksiar ha ka Tokyo Olympics, u la lah ban bat ïa ka nam lahduh ha ka Diamond League ha u 2022, kumjuh ha ka World Championship ha ka 2023 bad bat ruh ïa ka takma ksiar ha ka Asian Games ha China.
U la khur jingjop lai sien ha ka Diamond League bad khur ruh ïa ka takma rupa ha ka World Championships 2022. Te kumta une u rangïalehkai u la lah ban bat ïa ka rekod hapoh ka ri da kaba kawang haduh 89.94m.
