Shillong, Jymmang 09
Ka SCA ‘B’ ka la ïoh jingjop ha ka Women’s League ba la pynïaid da ka Shillong Cricket Association, hadien ba ka lah ban pynliem noh ïa ka WJDCA da 10 wiket ha ka sngi Palei ha madan Polo.
Ha kane ka jingïakhun, ka WJDCA ka la kam trai ban tied nyngkong ha kaba ka la kamai 55 run bad shah pynhap 5 wiket ha ki 10 over. Ka Evanki Passah ka la tied 12 run na ki 12 bol bad ka Retreki Poshna ka la ïoh 6 run na ki 9 bol. Katba ka Pinky Chanda bad ka Diya Biswa ki la khur mar 2 wiket na ka bynta ka SCA.
Haba wan shimti ïa ka pali kaba ar, ka SCA ‘B’ ka la kynjoh sha ka thong da kaba kamai 56 run ha ki 6.1 over. Kane ka la wan lyngba ka jingïalehkai bha ka Sruiti Kumari Ray kaba la tied 33 run na ki 25 bol bad ka Jayshree Singh ka la ioh 12 run na ki 13 bol. Ka Sruiti ka la khur ïa ka nam Player of the Match.
